Ձեր վստահելի աղբյուրը

Այսօր «Այո և Ոչ» հեռուստաշոուի շրջանակներում սահմանադրական փոփոխությունների հանրաքվեի «Այո»-ի և «Ոչ»-ի քարոզչական խմբերը շարունակում են հանրապետության մարզերում քարոզարշավը: Այսօր Շիրակի մարզի Մարալիկ քաղաքում Հ. Յ. Դաշնակցություն կուսակցության անդամ Արթուր Եղիազարյանը մարալիկցուն փորձում էր համոզել, որ Սահմանադրության նախագիծը երկրում շատ բան կփոխի:

«Չէ, ես էլ ասում եմ` հարգելի պրեզիդենտ, բերեք հինը օգտագործենք, մեր հինը, որ օգտագործենք, հարցերը կլուծվեն», -Եղիազարյանի հետ զրույցում ասաց Մարալիկի բնակիչը:

Դաշնակցականը հակադարձեց, որ «հին սահմանադրությունը» նախագահին մեծ լիազորություններ է տալիս, օրինակ` դատավորներ է նշանակում, ինչը Սահմանադրության նոր նախագծով կարող է անել խորհրդարանը:

«Եթե նախագահը դատավորին նշանակում է, հետո ասում է` էս հարցը սենց պետք ա լուծվի, դատավորը կգնա՞ նախագահի որոշման դեմ: Չէ, չի գնա: Այդ մենք էդպիսի արդարադատության համակարգ ունենք: Էս նոր Սահմանադրությամբ դատական համակարգը դառնում է անկախ», -ներկայացնում էր Եղիազարյանը:

Այդուհանդերձ, մարալիկցին անդրդվելի էր. «Հայաստանում մոտակա 50 տարիների ընթացքում անկախ ոչ մի բան հնարավոր չի»:

Եղիազարյանն ասաց, որ իրենք փորձում են մարդկանց մեջ վերականգնել հավատը կատարվող փոփոխությունների նկատմամբ. «Երբ ասում ենք` ոչ, նշանակում է համաձայն ենք, որ ոչ մի բան չփոխվի: Դու համաձայն ե՞ս, որ սենց մնա»:

«Այո» խմբի մյուս քարոզիչ ԱԺ Հանրապետական պատգամավոր Սամվել Ֆարմանյանը, որը ծնունդով Շիրակի մարզից է, հայրենակիցների հետ նարդի էր խաղում: Նկատենք, որ «Ոչ»-ի խմբին Մարալիկում միացել է հրապարակախոս, ԱԱԾ նախկին փոխտնօրեն Գուրգեն Եղիազարյանը: