Ձեր վստահելի աղբյուրը

Ազգային ժողովն այսօր  հատուկ ընթացակարգով քննարկեց «Ժառանգություն» խմբակցության քարտուղար Թևան Պողոսյանի հեղինակած «ԱԺ կանոնակարգ օրենքում փոփոխություններ կատարելու մասին» ՀՀ օրենքի նախագիծը: Պատգամավորն առաջարկում է հստակեցնել  խորհրդարանում կառավարության հետ հարց ու պատասխանի ժամանակ գրավոր և բանավոր հարցերով կառավարությանը դիմելու կարգը:

Թևան Պողոսյանի խոսքերով՝   նախագծով առաջարկվում է սահմանել, որ կառավարության հետ հարց ու պատասխանի ժամանակ պատգամավորները կարող են հնչեցնել միայն երկու գրավոր հարց, որից հետո կհնչեն բանավոր հարցերը:  Բացի այդ, առաջարկվում  է սահմանափակել հարց ու պատասխանի տևողություն՝ 3 րոպե հարց տալու ժամանակը հասցնել 2 րոպեի,  իսկ արձագանքների համար՝ 1-ական րոպե, ինչը կնպաստի, որ ավելի շատ հարցեր հնչեցվեն: 

Պատգամավորի խոսքերով՝  նոր ընթացակարգով առաջարկվում է 2-ական հարցի իրավունք տալ նախ ընդդիմադիր խմբակցությունների պատգամավորներին, ապա կոալիցիայի անդամ խմբակցությունների երկուական պատգամավորներին:

«Հաճախ ոչ ընդդիմադիր և անկախ պատգամավորները չեն կարողանում հասցնել նիստի ընթացքում իրենց հարցը հնչեցնել: Ներկայացված նախագծով առաջարկվում է փոխել այս կարգը: Ներկայացված նախագծով 2 գրավոր հարցերից հետո առաջինը հնչում են ընդդիմադիր խմբակցությունների 2-ական հերթագրված պատգամավորների, այնուհետև, ոչ ընդդիմադիր խմբակցությունների 2-ական հերթագրված պատգամավորների և դրանից հետո հերթագրված մյուս  պատգամավորների հարցերը: Այսպիսով, ներկայացված ընթացակարգի շնորհիվ առավել շատ պատգամավորներ հնարավորություն կստանան հարցեր ուղղել կառավարությանը»,- ասաց նա:

Նախագծի հարակից զեկուցող, Պետաիրավական հարցերի մշտական հանձնաժողովի նախագահ Հովհաննես Սահակյանն էլ տեղեկացրեց, որ նախագիծը մանրամասն քննարկել են հանձնաժողովում. «Եթե խորհրդարանում չլինի կոնսենսուս այս հարցով, հակված չենք, որ կյանքի կոչվի այն, որովհետև իսկապես փորձում ենք ձեռք տալ մի խնդրի, որը մեր պառլամենտարիազմին է վերաբերում, կուզենայի, որ բոլոր խմբակցություններն իրենց դիրքորոշումները հայտնեն, որ իմանանք` ինչ են անում»,- ասաց նա:

ԲՀԿ խմբակցության ղեկավար Նաիրա Զոհրաբյանը կոչ արեց ՀՀԿ-ին չմտածել, որ իրենք հավերժ մեծամասնություն են լինելու և իրենք են որոշելու: Նրա խոսքերով՝ այս փոփոխությունը դրական է, քանի որ շատ դեպքերում հարց տվողը պատմական էքսկուրսի է վերածում հարցը՝ սկսում է բրոնզի դարից, հետո հասնում է քարե դար: Այսպիսով, ըստ Ն.Զոհրաբյանի, ինքը պաշտպանում է այս նախագիծը, քանի որ գտնում է, որ գրագետ պատրաստված պատգամավորը կարող է իր մտքերը հնչեցնել նաև 1 րոպեի ընթացքում:

Հովհաննես Սահակյանն էլ արձագանքելով՝  ասաց. «Հիշեցնեմ,, որ նաև Կլեոպատրիայի ժամանակահատվածից էլ են մեջբերումներ արվում: Իսկ ՀՀԿ-ն հավերժ կլինի մեծամասնություն, թե ոչ, ապա դա ժողովուրդն է որոշում»:

Նաիրա Զոհրաբյանի արձագանքը չուշացավ. «Փաստորեն  խորհրդարանում Կլեոպատրիայի ժամանակաշրջանի հետ կապված լուրջ փորձառություն կա: Ինչ վերաբերում է Թևան Պողոսյանի նախագծին, ապա այն ճկուն է դարձնում խորհրդարանական համակարգի մեր գործիքը, քանի որ պարտադիր չէ հարց տալուց սկսել 16-րդ դարից և հասնել 21-րդ դար: Ինչ վերաբերում է գրավոր հարցին, ապա այն միանշանակ պետք է հանվի, քանի որ շատ անգամ մեծամասնության պատգամավորները պայմանավորվում են կառավարության ներկայացուցչի հետ և բենեֆիսը շքեղացնելու համար հարցը որոշվում է, պատգամավորը շնորհակալություն է հայտնում, հետո նա է շնորհակալություն հայտնում և այլն»:

Պատգամավոր Ռուբիկ Հակոբյանը նույնպես կողմ արտահայտվեց նախագծին: