Ձեր վստահելի աղբյուրը

Ազգային ժողովում  ընթացող 2016 թվականի պետական բյուջեի նախագծի քննարկման ժամանակ ՀՀ փոխվարչապետ, միջազգային տնտեսական ինտեգրման և բարեփոխումների նախարար Վաչե Գաբրիելյանը, արձագանքելով «Ժառանգություն» խմբակցության պատգամավոր Ռուբիկ Հակոբյանի հայտարարությանն այն մասին, թե վերմակի տակ կուչ եկած քաղաքացին հեռանկար չի տեսնում, որ չի կարծում, թե  վաղն այդ վիճակից դուրս կգա, հայտարարեց, որ հնչած գնահատականները որքան էլ պատկերավոր լինեն, սակայն չեն համապատասխանում իրականությանը:

«Իհարկե, վիճակը ծանր է, բայց դա չէի անվանի ծնկաչոք բնակչություն, ոչ էլ չէի անվանի կուչ եկած: Կառավարությունը տնտեսությունը զարգացնելու ուղղությամբ հնարավորինս ամեն ինչ անում է»,– ասաց Վաչե Գաբրիելյանը:

Անդրադառնալով տնտեսական աճին՝ փոխվարչապետը նշեց, որ 2014-2015թթ-ի տարածաշրջանային ազդեցության պայմաններում հնարավորինս ՀՀ կառավարությունը խթանել է տնտեսությունը՝  հարկային օրենսդրության բարեփոխումներով, տնտեսվարման վիճակի լավացումով, ինչպես նաև պետական ծախսերով:

Ըստ նրա՝ վերջին շրջանում շատ է շոշափվում արտաքին պարտքի հարցը, ուստի նպատակահաարմար է գտնում քննարկել ինչքան է պարտքը և ուր է այն գնում:

«Վերջին 1,5 տարիների ընթացքում ՀՀ կառավարությունը կնքել է շուրջ 35 պայմանագիր և ներգրավել 1,5 մլրդ դոլարի չափով գումար՝ չհաշված պարտատոմսերը, այդ թվում՝ նաև զարգացման ֆինանսական կառույցների կողմից, որից տնտեսություն է գնացել 146 մլն-ը: Այսինքն՝ մենք ոչ թե վերցրել ենք անմիջապես 1,5 մլրդ, այլ այդքան գումարի չափով ծրագրեր ենք սկսել»,- հայտնեց Վ.Գաբրիելյանը: 

Իսկ ինչ վերաբերում է այն հայտարարություններին, թե բյուջեում գումարներ չկան,  հարկերը քիչ են հավաքագրվում, փոխվարչապետը վստահեցրեց, որ գումարներ կան, հենց այս պահին կառավարության հաշվին կա 75 մլրդ-ի չափ գումար. «Միաժամանակ դրա հետ մեկտեղ 300 միլիոնանոց ծրագիր է նախատեսվում: Այդ գումարը միանգամից չի գա, այլ առաջին տարում 100 մլն-ի չափով կստանանք: Դրա տրամաբանությունը  ամենևին գումարներ վճարելը չէ, այլ հնարավորություն է երեք տարիների ներկայացրած ծրագրերով բարեփոխումներ անել: Իսկ միջազգային ֆինանսական կառույցները հենց այնպես գումարներ չեն տալիս, դրանք կառուցվածքային բարեփոխումների  համար են, որպեսզի բարեփոխումների ժամանակ հնարավորություն լինի որոշակի խնդիրներ լուծել»: 

Այսպիսով, ըստ Վաչե Գաբրիելյանի, այդ 300 մլն-ը վարկ չէ, այլ 300 մլն-ի հնարավորություն: «Ներգրավված միջոցներից, եթե ուշադրություն դարձնեք հրապարակված թվերին, այս տարի մինչև հոկտեմբերի վերջ ծախսվել է 59 մլրդ ծրագրային նպատակներով և 11 մլրդ՝ բյուջետային աջակցության։ Որտե՞ղ են այդ գումարները, այդ գումարները ճանապարհներ են, էլեկտրահաղորդականության գծեր են, ոռոգման ծրագրեր են, որոնք ինչպես փորձը վկայում է համաշխարհային՝ տնտեսությունը խթանելու լավագույն միջոցներ են: Մենք բոլոր ջանքերը ներդնելու ենք, որպեսզի կարողանանք էժան միջոցներով, որոնք ներգրավում ենք արտոնյալ պայմաններով՝  ենթակառուցվածքների վրա ծախսեր անենք»,-ասաց նա:

Վ. Գաբրիելյանը նշեց, որ խթանման այս քաղաքականությունը շարունակվելու է. «Մենք վարկավորելու ենք ձեռնարկություններ, որոնք ստրատեգիական նշանակություն ունեն և ազդեցություն ունեն տնտեսական աճի վրա»:

Նա  անդրադարձավ նաև արտաքին պարտքին՝ ասելով, որ այն կայուն է. «Նոյեմբերի 6-ին Արժույթի միջազգային հիմնադրամի խորհուրդը հաստատեց ՀՀ-ի տրանշը, գումարը մեծ չէր` 17 մլն, որը չի գնում ՀՀ-ի կառավարությանը, գնում է  պահուստների համալրմանը, սակայն խոշորագույն հարցը այն է, որ մանրակրկիտ վերլուծություն կա պարտքի կայունության, բոլոր  հնարավոր շոկերը դիտարկվում են, և այդ պայմաններում վերդիկտը մեկն է՝ պարտքը կայուն է, և այս միջոցներով մենք շարունակելու ենք խթանել տնտեսությունը»: