Ձեր վստահելի աղբյուրը

Սյունիքի մարզի Բռնակոթ համայնքում բնակիչներից մեկը ԱԺ աշխատակազմի ղեկավար Հրայր Թովմասյանից հետաքրքրվեց. «Սուրբ հոգի իջա՞վ ձեր բոլորի վրա, որ մի օր որոշեցիք փոխել Սահմանադրությունը»:

«Ոչ», -գյուղացուն արձագանքեց Թովմասյանը և ասաց, որ գյուղացու հարցին կպատասխանի որպես իրավաբան և սահմանադրագետ:

Նա տեղեկացրեց, որ դեռ 1993 թվականից ինքը «կռիվ էր տալիս», որ Հայաստանն անցնի խորհրդարանական կառավարման:

«Այստեղ իշխանության ու ընդդիմության կռիվ չի, ժողովուրդ ջան, որ գամ պաշտպանեմ` ներկայացնելով, թե իշխանությունն ինչ լավ բաներ է արել, իսկ ընդդիմությունն էլ վատ բաներ է արել: Թող ոչ մի ընդդիմադիր Ալիկ Արզումանյանից ու Ռուբիկ Հակոբյանից իրեն ավելի մեծ ընդդիմադիրի տեղ չդնի, թող ոչ մեկ իրեն դաշնակցությունից ավելի մեծ ընդդիմադիրի տեղ չդնի: Նրանք բոլորը պաշտպանում են այս նախագիծը: Սա իշխանության կռիվ չի», -դիմելով դահլիճում հավաքված բռնակոթցիներին, հայտարարեց Թովմասյանը:

Նա տեղեկացրեց, որ «այս նախագիծը գրելու համար Հանձնաժողովի իշխանությունների հետ կռիվ են տվել, համոզել, հիմնավորել ու փաստարկներ ներկայացրել»: Իրեն հարց տված գյուղացուն ԱԺ աշխատակազմի ղեկավարն ասաց, որ մի օր այդ մասին մի պատմություն կգրի և բոլորը կհասկանան որ «այդքան էլ հեշտ չի եղել»:

«Հերիք է, ես գամ լավ կլինի, հորս արև, լավ կլինի, չկա նման բան. էդ մարդիկ կգան ու կգնան, բան չի փոխվի: Սա իշխանության կռիվ չէ, սա վաղվա օրվա կռիվ է: Էս համակարգը լավ չի աշխատում, էս համակարգի ժամանակն անցել է: Էս նույն համակարգի դեպքում առաջին նախագահը կուսակցություն է փակել, երկրորդ նախագահը` հեռուստաընկերություն ու ոչ մեկն էլ դրա համար պատասխանատվություն չի կրել: Էս համակարգով, ընդհանրապես, կարելի է բոլորի բերանը փակել ու ոչ մի պատասխանատվության չենթարկվել: Էս համակարգը դրա պատասխանատվությունը տալիս է: Ու որ գործող նախագահը ունի էդ խոհեմությունը, հասկանում է երկիրը ինչ է, պատերազմ է տեսել ու հիմա ունենք խոսքի ազատություն և այլն էդ ամենը կախված է Սերժ Սարգսյանից», -հայտարարեց պաշտոնյան:

Նա հորդորեց «անձերի կռիվ» չանել` դրանք գալիս են ու գնում, այլ ընտրել համակարգի փոփոխությունը:

Հարց տված գյուղացին նկատեց, որ սահմանդրության նախագծով զբաղվող հանձնաժողովը պետք է որոշի այդ հարցը, գյուղացին չի հասկանում էդ ամենից, մասնագետ չեն:

Ի պատասխան Թովմասյանն արձագանքեց. «Ես խոնարհվում եմ Ձեր իմաստնության առջև. Միացյալ Նահանգների նման երկիրը գտել է, որ Սահմանադրությունը չի կարելի հանրաքվեով ընդունել: Եվրոպայի խորհրդում միայն Ռումինիան ու Հայաստանն են, որ ասում են Սահմանադրության ընդունման համար գնանք ժողովրդի մեջ, սա կեղծ պոպուլիզմ է: Սահմանադրությունը բարդ փաստաթուղթ է»: