Ձեր վստահելի աղբյուրը

Փարիզի Սուրբ Հովհաննես Մկրտիչ Առաջնորդանիստ մայր տաճարում շարունակվում է Հայոց ցեղասպանության 100-րդ տարելիցին նվիրված ցուցադրությունը և գրքերի բարեգործական վաճառքը: Այս մասին տեղեկանում ենք Հայոց ցեղասպանության թանգարան-ինստիտուտի պաշտոնական կայքից: 

Ֆրանսահայ համայնքին ներկայացվել է փոստային բացիկներ, որոնց վրա պատկերված են հայկական եկեղեցիները: Բացիկները թողարկվել են 20-րդ դարասկզբին միջազգային փոստային ծառայության կողմից:

Աշխարհի տարբեր երկրներում տպագրված բացիկներում պատկերված էին Արևմտյան Հայաստանի, Իրանի, Ռուսաստանի, Վրաստանի, Հայաստանի և այլ երկրների հայկական եկեղեցիները:

«Եկեղեցիների մեծ մասը չկա: Սա է ցավալի իրողությունը և ցուցադրության խորհուրդը ՝ կապված այս տարվա հետ: Դրանք ավերվել են Եղեռնի տարիներին կամ դրանից հետո թուրքական քաղաքականության հետևանքով, նպատակաուղղված ավերվել են բոլշևիկյան իշխանության օրոք: Հրաշքով պահպանված եկեղեցիների շենքերի նախնական տեսքն եք տեսնում: Դրանք այսօր փոփոխված են: Կամ վերածվել են մզկիթի, ինչպես Այնթապի եկեղեցին, կամ էլ ամբողջությամբ փոփոխված են, ինչպես օրինակ Երևանի Սուրբ Սարգիս եկեղեցին է: Ավաղ, այս եկեղեցիների մեծ մասը ժամանակի զոհն են դարձել», - միջոցառման բացման ժամանակ ունեցած ելույթում ասել է ՀՑԹԻ տնօրեն Հայկ Դեմոյանը:

Միջոցառման ընթացքում հնարավոր է ձեռքբերել ՀՑԹԻ հրատարակած գրքերը: Դրանց վաճառքից ստացված գումարը հատկացվելու է սիրիահայերի նպաստամատույցին: Ցուցադրությունը բաց է մինչև նոյեմբեր 22-ը:

Հիշեցենք, որ Հայոց ցեղասպանության թանգարան-ինստիտուտը հոկտեմբեր-նոյեմբեր ամիսներին կազմակերպում է բարեգործական դասախոսությունների և շնորհանդեսների շարք: Միջոցառումները նախատեսված են Մոսկվայում, Փրովիդենսում, Բոստոնում, Փարիզում և Բեյրութում: Հայոց ցեղասպանության 100-րդ տարելիցի Լիբանանի կենտրոնական հանձնախմբի հետ համատեղ նոյեմբերի վերջում «Հիշողության շաբաթ» խորագրի ներքո կազմակերպվելու են բարեգործական դասախոսություններ, շնորհանդեսներ և ցուցադրություններ: Նախաձեռնության նպատակն է հանգանակած միջոցները տրամադրել սիրիահայ համայնքին:

Լուսանկարները՝ Հայոց ցեղասպանության թանգարան-ինստիտուտի  պաշտոնական կայքից: