Ձեր վստահելի աղբյուրը

ՀՀ Ազգային ժողովում այսօր 2016 թվականի պետական բյուջեի նախագծի քննարկման ժամանակ ՀԱԿ խմբակցության պատգամավոր Նիկոլ Փաշինյանը ԱԺ Պաշտպանության, ազգային անվտանգության և ներքին գործերի հանձնաժողովի նախագահ Կորյուն Նահապետյանից հետաքրքվեց, թե ինչ տվյալների վրա է հիմնվել նա, երբ ասում է՝ արագաչափերի և տեսախցիկների տեղադրումը նվազեցրել է ճանապարհատրանսպորտային պատահարների թիվը:

«Ես Ձեզ ներկայացնում եմ պաշտոնական վիճակագրության տվյալները: Այսպես, 2012 թվականին հանրապետությունում գրանցվել է 2602 ճանապարհատրանսպորտային պատահար, 2013-ին՝ 2824, 2014թ-ին՝ 3156 պատահար: Այսինքն՝  երբ 2012թ-ին տեղադրվել են արագաչափերը և տեսախցիկները,  ճանապարհատրանսպորտային պատահարների թիվը 2014 թվականի աճը 21 տոկոս է կազմում, իսկ տուժածների թիվը աճել է՝ 17 տոկոս: էդ Ձեզ առանձին տվյալներ են տալիս, մեզ առանձի՞ն»,- հարցրեց նա:

Ի պատասխան՝ Կորյուն Նահապետյանը նշեց, որ իր տվյալները վերցված են ոստիկանությունից և առաջարկեց Փաշինյանին հանդիպել հանձնաժողովի նիստում, և քննարկել ու հասկանալ, թե որտեղ է անճշտությունը:

Նիկոլ Փաշինյանն անդրադարձավ նաև նախակրթարանների երեխաներին սննդով ապահովող ծրագրին, որում ընդգրկված են Արարատի, Սյունիքի և Վայոց ձորի մարզերը:

«Բազմաթիվ սահմանամերձ գյուղեր այս ծրագրից դուրս են մնում, ճիշտ չե՞ք համարում, որ առաջին հերթին պետք է ապահովվեին հենց սահմանամերձ համայնքի երեխաները, սակայն Հայաստանի ամենաառատ գյուղերն են ընկնում այս ծրագրի տակ, այսպես ուղղակի չի կարելի»,-ասաց նա:

Կ.Նահապետյանն էլ պատասխանեց, որ Ազգային անվտանգության ամրապնդման տեսանկյունից սահմանամերձ համայնքների ամրապնդումը գերակա է իրենց համար և դրա ուղղած ցանկացած նախաձեռնություն ողջունելի է: Նա նշեց, որ կարող են համապատասխան քննարկման հարթակներում անդրադառնալ այդ հարցին:

«Ինչ ասում ենք, ասում եք հավաքվենք քննարկենք, շատ պարզ է խնդիրը: Մովսես գյուղի աշակերտին, որ ամեն օր թշնամու ուղիղ նշանառության տակ գնում է դասի, սննդի ծրագիր չենք անում, այստեղ քննարկելու բան չկա, այստեղ առաջնահերթությունների խնդիր կա»,- նշեց Ն. Փաշինյանը:

Հարցին անդրադարձավ նաև ԱԺ նախագահ Գալուստ Սահակյանը և նշեց, որ Նիկոլ Փաշինյանի հարցադրումը շատ կոնկրետ է:

«Ես կարծում եմ՝ խորհրդարանն աջակից կլինի Ձեր հարցադրմանը»,-ընդգծեց նա: