Ձեր վստահելի աղբյուրը

«Այսօր հայրս կլիներ հարյուր և մայրս՝ իննսունհինգ տարեկան: Թանկագին այդ տարելիցների առիթով է այս համերգը, որը խոնարհաբար նվիրում եմ նրանց  ծնողական հանճարին»,-Panorama.am-ի հետ զրույցում ասաց ՀՀ ժողովրդական արտիստ դաշնակահարուհի Սվետլաննա Նավասարդյանը՝ խոսելով  նոյեմբերի 18-ին Արամ Խաչատրյան համերգասրահում կայանալիք  իր մենահամերգի մասին, որի խորագիրն է «Նվիրում ծնողներիս»:

Դաշնակահարուհու խոսքով, ծնողների հետ կապված հուշերն իրեն մշտապես տանում են մանկության Ալավերդին, որտեղից  էլ իր համար սկսվել է երաժշտությունը. «Մանկությանս Ալավերդին ինձ համար այդպես էլ մնաց աշխարհի կենտրոնը՝  իր ցաքուցրիվ տների մեջ առանձնացող մեր անուշաբույր օջախով,  «խորհրդավոր» ժողկրթբաժնով, ուր գիշեր-ցերեկ աշխատում էր հայրս, «Սպանդարյան» դպրոցով, որտեղ դասավանդում էր մայրս, և քաղաքի մոռացված մի անկյունում ծվարած երաժշտական դպրոցով, որտեղ մատներիս հպմանն առաջին անգամ պատասխանեց դաշնամուրը:  Այստեղ թև առան երազանքներս, որոնց ծնողներս հավատարիմ մնացին մինչև վերջ»:

Ս.Նավասարդյանը պատմեց, որ Ալավերդիում հսկայական գրադարան ունեին, որ հավաքել էր հայրը՝ Հովհաննես Նավասարդյանը՝ մասնագիտությամբ պատմաբան, կրթության գործի ջատագովներից, ով հետպատերազմյան դժվարին տարիներին ղեկավարել է Ալավերդու, Նոյեմբերյանի շրջանային ժողկրթության բաժինները, հետագայում՝  Երևանի Շահումյանի շրջանի ժողկրթության բաժինը,  եղել է Երևանի թիվ 102 դպրոցի հիմնադիր տնօրենը:

Մայրը՝ Հրանուշ Պետրոսյանը,  եղել է մանկավարժ-մաթեմատիկոս: 
«Պրոֆեսիոնալ երգչուհի էր նաև, արքայական լիրիկա-դրամատիկական սոպրանո: Մորս ձայնը, նրա  երգեցողությունը եղան իմ «առաջին երաժշտական համալսարանները» և, անշուշտ, իմ իբրև արտիստի  ձևավորման և կայացման  գործում մորս դերը դժվար է գերագնահատել»,- ասաց ՀՀ ժողովրդական արտիստ դաշնակահարուհի Սվետլաննա Նավասարդյանը:

Համերգին դաշնակահարուհին կատարելու է Հայդն, Բրամս, Շոպեն և Կոմիտաս: 

Ս. Նավասարդյանը 1965-1968 թվականներին սովորել է Երևանի պետական կոնսերվատորիայում (Վ.Ումր-Շատի դասարան), 1971թվականին ավարտել է Մոսկվայի կոնսերվատորիան (Յակով Զակի դասարան), 1973 թվականին՝ ասպիրանտուրան։ Մամուլը նրան «մոգական» է կոչել, երաժշտական աշխարհը` «անուրանալի» անհատականություն, «դաշնամուրային հրաբուխ», իսկ երաժշտագիտական քննադատությունը, փորձելով տալ նրա կատարողական ինքնության սահմանումը, Սվետլանա Նավասարդյանին խորհրդանիշ է կարգել` «խորհրդանիշ ընդվզումի, որ դեմ է այն ամենին, ինչը դաշնամուրային արվեստում առօրեականություն ու կանխատեսելիություն է մարմնավորում»:

Սվետլանա Նավասարդյանը դափնեկիրն է Շումանի, Բախի, Եղսաբեթ թագուհու անվան և Սիդնեի միջազգային մրցույթների, և պատահական չէ, որ նրա առջև շատ վաղ են բացվել աշխարհի ամենահեղինակավոր փառատոների և համերգասրահների դռները, ինչպիսիք են Մոսկվայի Կոնսերվատորիայի Մեծ դահլիճը, Սիդնեյի «Opera House, Բրյուսելի «Palais des Beaux-Arts, Փարիզի «Gaveau, Լայպցիգի «Gewandhaus, Բուենոս Այրեսի «Teatro Colon, Տոկիոյի «Asahi Hall, Օսակայի «Phoenix-Hall, Ստոկհոլմի «Nybrokajen   և  այլք:

Դաշնակահարուհին համերգներով հանդես է եկել աշխարհի ավելի քան 40 երկրներում, այդ թվում` ԱՄՆ, Կանադա, Ֆրանսիա, Իսպանիա, Իտալիա, Գերմանիա, Հունաստան, Ճապոնիա, Չինաստան, Ավստրալիա, Եգիպտոս, Քուվեյթ և այլն: Միջազգային հռչակ ու ճանաչում վայելող  Սվետլանա Նավասարդյանի երաժշտական կարիերան լի է նաև անվանի երաժիշտների հետ համագործակցության բազմաթիվ դրվագներով` Եվգենի Սվետլանով, Վալերի Գերգիև, Վասիլի Սինայսկի, Կառլ Էտտի, Քրիստոֆեր Ուորեն-Գրին, Էլիսո Վիրսալաձե, Եվգենի Կիսին, Վլադիմիր Սպիվակով, Յուրի Բաշմետ և շատ ուրիշներ: Սվետլանա Նավասարդյանի մեկնած երկերի ցանկը ներառում է դաշնամուրի և նվագախմբի համար գրված վաթսունից ավելի կոնցերտ, այդ թվում` Բախի, Մոցարտի և Բեթհովենի բոլոր կոնցերտները, մոնոգրաֆիկ մենանվագային ծրագրեր: 
Երաժիշտը համագործակցում է Փարիզի` Ecole Normale de Musique, Ստոկհոլմի` Lille Academia, Էսսենի` Hochschule fur Musik, Ֆռանսիայի, Գերմանիայի, Ճապոնիայի երաժշտական հեղինակավոր այլ հաստատությունների հետ: Երևանի Կոմիտասի անվան պետական կոնսերվատորիայի հրավիրյալ պրոֆեսոր է,  վարպետության դասեր է վարում  աշխարհով մեկ: Սվետլանա Նավասարդյանը ՀՀ կառավարական բարձրագույն պարգևի` «Մեսրոպ Մաշտոց» շքանշանակիր է (2010 թ.), նաև՝ Ամենայն Հայոց Կաթողիկոս Ն.Ս.Օ.Տ.Տ Գարեգին Բ-ի կողմից շնորհված, Հայաստանյայց Արաքելական Սուրբ Եկեղեցու՝ «Սուրբ Սահակ-Սուրբ Մեսրոպ» շքանշանի ասպետ (2015 թ.):