Ձեր վստահելի աղբյուրը

Շարունակվում են Սևանա լճի «սիգ» ձկնատեսակի վաճառքի կանխարգելմանն ուղղված ստուգայցեր Երևանի և մարզերի շուկաներ, կազմակերպվում են ստուգայցեր նաև  Սևանա լճի վրա և «Սևան» ԱՊ տարածքում: Այս մասին հայտնում են ԲՆ մամուլի ծառայությունից:

Նախարարության հաղորդած տվյալների համաձայն՝ վերջին մեկ շաբաթվա ընթացքում հանրապետության խոշոր համայնքների հանրային առևտրի կետերի հարակից տարածքներում,  բացահայտվել են «սիգի» վաճառքի դեպքեր:

Մասնավորապես` նոյեմբերի 10-ից 17-ը Երևանում և ՀՀ մարզերում իրականացրած միջոցառումների ժամանակ ՀՀ բնապահպանության նախարարության աշխատակիցներն առգրավել են համապատասխանաբար 279հատ (257կգ ) և 43-հատ (ՀՀ Շիրակի և Լոռու մարզերից) «սիգ» տեսակի ձուկ:

Մինչ այդ նախորդ երեք շաբաթների ընթացքում առգրավվել էր 333 հատ (176.5 կգ ) «սիգ» և 54,4 կգ «կարաս» տեսակի ձուկ: Ընդհանուր առմամբ վերջին մեկ ամսում Բնապահպանական պետական տեսչության տարածքային ստորաբաժանումների շրջայցերի արդյունքում առգրավվել է 655 հատ (453.5կգ) «սիգ» տեսակի  և 54.4 կգ. «կարաս» տեսակի ձուկ:

Երևանում առգրավված ձկները հատկացվել են Արաբկիր վարչական տարածքի  «Արշավիր և Պայծառ Աբրահամյանների» բարեգործական ճաշարանին, «Զատիկ» երեխաների աջակցության կենտրոն» ՊՈԱԿ-ին, Երևանի «Նիկողոս Տիգրանյանի» անվան տեսողության խանգարումներ ունեցող երեխաների թիվ 14 հատուկ դպրոց ՊՈԱԿ-ին, «Նորքի տուն-ինտերնատ»ՊՈԱԿ-ին և Նոր Նորքի բարեգործական ճաշարանին: