Ձեր վստահելի աղբյուրը

Առաջիկայում Երևանում տեղադրվելու են հայ անվանի գիտնական, բժշկական գիտությունների դոկտոր, պրոֆեսոր Կարեն Քյանդարյանի, ՀՀ վաստակավոր արտիստուհի Բելլա Դարբինյանի, ՀՀ ժողովրդական նկարիչ Անատոլի Պապյանի հիշատակը հավերժացնող հուշատախտակներ: Հուշատախտակների տեղադրման մասին որոշումներն ընդգրկված են նոյեմբերի 25-ին կայանալիք Երևանի ավագանու 6-րդ նստաշրջանի 3-րդ նիստի օրակարգում:

Կարեն Քյանդարյանի հիշատակը հավերժացնող հուշատախտակը փակցնելու է Կոմիտասի պողոտա հ. 63 հասցեում /7-րդ մուտք/: 
Հայ մեծանուն ռենտգենոլոգ-ռադիոլոգ, սրտաբան և մեծ գիտնական Կարեն Քյանդարյանը ծնվել է 1925թ. հունվարի 11-ին։ Նա գիտական, գիտակազմակերպչական, դասախոսական և հասարակական գործունեության ընթացքում մեծ ավանդ է թողել գիտության և առողջապահության զարգացման բնագավառում։ Ստեղծել է երկու խոշոր գիտական կենտրոններ և երկու տասնյակ տարի ղեկավարել Հայաստանի ԳԱԱ սրտաբանության և սիրտանոթային վիրաբուժության գիտահետազոտական ինստիտուտը և ռադիոբիոլոգիայի ինստիտուտը, որը ներկայումս վերանվանվել է ՀՀ առողջապահության նախարարության «Ճառագայթային բժշկության և այրվածքների գիտական կենտրոն» ՓԲ ընկերություն։ Կարեն Քյանդարյանը մահացել է 2013թ. մայիսի 25-ին։ Կարեն Քյանդարյանի հիշատակը հավերժացնող հուշատախտակը Երևան քաղաքի Կոմիտասի պողոտա հ. 63 հասցեում /7-րդ մուտք/ փակցնելու վերաբերյալ միջնորդություններ են ներկայացվել ՀՀ առողջապահության նախարարության «Ճառագայթային բժշկության և այրվածքների գիտական կենտրոն» ՓԲ ընկերության տնօրեն Ն. Դավիդյանի, «Լ. Հովհաննիսյանի անվան սրտաբանության գիտահետազոտական ինստիտուտ» ՓԲ ընկերության տնօրեն Ս. Հովհաննիսյանի, Հայկական տեխնոլոգիական ակադեմիայի նախագահ Վ. Դավթյանի և Երևան քաղաքի գլխավոր ճարտարապետ Տ. Բարսեղյանի կողմից։

Բելլա Դարբինյանի հիշատակը հավերժացնող հուշատախտակը փակցվելու է Ավետ Ավետիսյան փողոց հ.8 հասցեում: 
ՀՀ վաստակավոր արտիստուհի Բելլա Դարբինյանը ծնվել է 1936թ. փետրվարի 10-ին Վանաձորում։ 1955թ. ընդունվել է Ռ. Մելիքյանի անվան երաժշտական ուսումնարան, 1959թ. երաժշտական կրթությունը շարունակել է Երևանի Կոմիտասի անվան պետական կոնսերվատորիայում: 1962թ. ուսումը շարունակել է Մոսկվայի «Մեծ թատրոն»-ին կից ստուդիայում: Հանդես է եկել Կարմենի, Ազուչենայի, Ամներիսի և շատ ուրիշ օպերային դերերով։ Հետագայում գործունեությունը շարունակել է երգարվեստի էստրադային ոճում: 1966թ. ընդունվել է Հայաստանի ռադիոպետկոմի էստրադային սիմֆոնիկ նվագախումբ` որպես մեներգչուհի, որտեղ աշխատել է շուրջ 30 տարի: Նույն թվականին էստրադային երգերի մրցույթում շահել է ոսկե մեդալ և արժանացել ՀԽՍՀ վաստակավոր արտիստի կոչմանը: Կատարել է նաև ժողովրդական երգեր, գուսանական ռոմանսներ և արժանացել բարձր գնահատականի հայկական երգարվեստի մեծերի կողմից: Համերգներով հանդես է եկել Հայաստանում և արտերկրում: 2003թ. համերգներով եղել է ԱՄՆ-ում, որտեղ հետագայում թողարկվել է 2 ձայնասկավառակ: Բելլա Դարբինյանը մահացել է 2005թ. Երևանում: ՀՀ վաստակավոր արտիստուհի Բելլա Դարբինյանի հիշատակը հավերժացնող հուշատախտակն Ավետ Ավետիսյան փողոց, հ.8 հասցեում փակցնելու վերաբերյալ միջնորդություն է ներկայացվել ՀՀ մշակույթի նախարարի տեղակալ Ա. Պողոսյանի կողմից։

Անատոլի Պապյանի հիշատակը հավերժացնող հուշատախտակը փակցվելու է Կիևյան փողոց հ.24 հասցեում: 
Անատոլի Պապյանն ավարտել է Երևանի գեղարվեստաթատերական ինստիտուտը, 1951-1953 թթ. կատարելագործվել է Մոսկվայում: 1953թ. դասավանդել է Երևանի Փ. Թերլեմեզյանի անվան գեղարվեստի ուսումնարանում, 1962թ.՝ Երևանի գեղարվեստաթատերական ինստիտուտում։ 1983թ. արժանացել է Հայաստանի ժողովրդական նկարչի կոչման: 1984թ. Անատոլի Պապյանին շնորհվել է պրոֆեսորի կոչում: Նրա աշխատանքներից հայտնի են «Մեղեդի» (1960թ.), «Մեսրոպ Մաշտոց» (1962թ.), «Առավոտ» (1978թ.), «Օջախ» (1983թ.), «Որդիները» (1965թ.), «Ռեքվիեմ ըստ Նարեկացու» (1987- 2000թթ), «Գարուն ա, ձուն ա արել» (2000թ.), «Պար հին ծառերի տակ» (2000թ.), «Ռեքվիեմ ըստ Նարեկացու» (2003թ., եռապատկեր), «Առավոտ» (2004թ.), «Կեսօր» (2004թ.), «Երեկո» (2004թ.) կտավները: Անատոլի Պապյանն անհատական ցուցահանդեսներ է ունեցել Երևանում (1981թ., 1999թ., 2004թ.), Փասադենայում (2000թ.)։ Նրա աշխատանքները պահվում են Հայաստանի ազգային պատկերասրահում, Մոսկվայի արևելքի ժողովուրդների արվեստի պետական թանգարանում և այլուր։ Անատոլի Պապյանը մահացել է 2007թ. Երևանում: ՀՀ ժողովրդական նկարիչ Անատոլի Պապյանի հիշատակը հավերժացնող հուշատախտակը Կիևյան փողոց հ.24 հասցեում փակցնելու վերաբերյալ միջնորդություն է ներկայացվել Հայաստանի նկարիչների միության նախագահ Կ. Աղամյանի կողմից։