Ձեր վստահելի աղբյուրը

Պետական բյուջեի նախագիծը քաղաքական և տնտեսական կարևոր նշանակություն ունեցող փաստաթուղթ է, որն արտացոլում է հանրապետությունում առկա քաղաքական, սոցիալական ու տնտեսական  իրավիճակը, սոցիալ-տնտեսական քաղաքականության իրականացման ուղղությունները և զարգացման միտումները մոտակա ժամանակահատվածում: Այս մասին այսօր Ազգային ժողովում ՀՀ 2016 թ. պետական բյուջեի նախագծի քննարկման ժամանակ ասաց ՀՀ ԱԺ նախագահ Գալուստ Սահակյանը:

«Այս առումով 2016 թ. պետական բյուջեն հիմնված է առաջիկա տարվա սոցիալ-տնտեսական զարգացման առաջնահերթությունների ու դրանց իրագործման հնարավորությունների արդյունավետ հավասարակշռման ու իրատեսականության վրա»,- ընդգծեց ԱԺ նախագահը:

Մասնավորապես, 2016 թ. պետական բյուջեի նախագծով նախատեսվում է, որ գալիք տարի ՀՆԱ-ի իրական աճը կկազմի 2.2%, արդյունաբերությունը կաճի 3.7%-ով, գյուղատնտեսությունը՝ 4%-ով, ծառայությունների ոլորտը՝ 1.3 %-ով, շինարարության ոլորտը՝ 1%-ով:

Ըստ Գ.Սահակյանի՝ ակնհայտ է, որ 2016 թ. մակրոտնտեսական կանխատեսումները կատարվել են իրատեսության դիրքերից՝  նպատակ հետապնդելով ստեղծել տնտեսական հետագա զարգացման համար իրական նախադրյալներ ապահովող համապատասխան միջավայր:

«Կարծում եմ՝  գնահատելի է կառավարության այս մոտեցումը՝ հաշվի առնելով այն օբյեկտիվ իրողություններն ու դժվարությունները, որոնք առկա են ներկայումս և ուրվագծվում են եկող տարվա համար»,-ասաց Գակուստ Սահակյանը:

Նրա խոսքերով՝  հաջորդ տարվա պետական բյուջեի նախագիծն արտահայտում է հանրապետությունում առկա տարաբնույթ խնդիրները և դրանց լուծման հնարավորությունները: Այն, ըստ Գ.Սահակյանի, ունի հստակ ծրագրային հենք՝ Ազգային ժողովի հավանությանն արժանացած կառավարության ծրագիրը, կառավարության հաստատած հեռանկարային զարգացման և պետական ու ժամկետային ծախսերի ծրագրերը, ինչպես նաև զանազան ոլորտային ծրագրեր:

Գ.Սահակյանը կարևորեց նաև այն հանգամանքը, որ բյուջեի նախագիծը ներկայացվել է հիմնականում ծրագրային բյուջետավորման ձևաչափով, որը հնարավորություն է տալիս հստակ պատկերացնել պետական ծախսերի նպատակները, դրանց իրականացմանն ուղղված միջոցառումները և ակնկալվող արդյունքները:

ԱԺ նախագահը նշեց նաև, որ բյուջեի նախագծով ծախսերի գրեթե կեսը բաժին է ընկնում սոցիալ-մշակութային ոլորտին, այսինքն՝ սոցիալական ոլորտի հիմնախնդիրները մշտապես գտնվում են երկրի իշխանությունների ուշադրության կենտրոնում, և արվում է հնարավորը դրանց արդյունավետ լուծման ուղղությամբ:

«Մենք հակված չենք այն մտքին, որ արվող քայլերը բավարար են բնակչության սոցիալական պայմանների շեշտակի բարելավման համար: Դա երկարատև գործընթաց է՝ պայմանավորված առաջին հերթին երկրի ֆինանսական հնարավորություններով: Սակայն անժխտելի է իշխանությունների կամքը առկա հնարավորությունների պայմաններում քննարկել սոցիալական խնդիրների առավել լայն շրջանակ և առավելագույնս լուծել այդ խնդիրները»,- ընդգծեց Գ.Սահակյանը:

ԱԺ նախագահի գնահատմամբ՝  2016 թ. պետական բյուջեն հնարավորությունների բյուջե է:

«Մենք կարևորում ենք այն հանգամանքը, որ ինչպես նախորդ տարիներին, այս տարի ևս կառավարությունը գործնական քայլեր է ձեռնարկում գործարար միջավայրի բարելավման ուղղությամբ: Այս համատեքստում կցանկանայի կառավարության ուշադրություն սևեռել փոքր և միջին ձեռնարկատիրության զարգացման հնարավորությունների ստեղծման վրա: Սա շատ կարևոր է, քանի որ աշխարհում փոքր և միջին ձեռնարկատիրության սուբյեկտներն ապահովում են զբաղվածության շուրջ 90 տոկոսը և համախառն եկամտի՝ 70 տոկոսը: Այս առումով ՓՄՁ-ների ոլորտը մեր երկրում զարգացման մեծ ներուժ ունի,հիմնական խնդիրները համապատասխան նախադրյալների ապահովումն է»,- ասաց ԱԺ նախագահը՝ հավելելով, որ ոլորտի զարգացմանն ուղղված աջակցությունը պետք է լինի  հասցեական, նպատակային և արդարացված:

Միաժամանակ, ըստ նրա, Կառավարությունը գործուն միջոցներ պետք է կիրառի ձեռնարկատիրական գործունեությամբ զբաղվողների պետական աջակցությամբ տարբեր ձևերի տրամադրման, ՓՄՁ-ների վարկավորման համար   անհրաժեշտ ֆինանսական ռեսուրսների ներգրավման, սոցիալական ուղղվածություն ունեցող ծրագրերի իրականացման և պետության կողմից ստանձնած սոցիալական պարտավորությունների կատարման  առաջնահերթության ապահովման նպատակով:

«Գաղտնիք չէ, որ մենք ապրում ենք աշխարհաքաղաքական և համաշխարհային տնտեսական զարգացումների բարդ պայմաներում, որոնք իրենց ուղղակի և անուղղակի անդրադարձ են ունենում մեր տնտեսության վրա: Նման իրավիճակում կարևոր է պետական ռեսուրսների հիմնավորված և ռացիոնալ  օգտագործումը, որի ամրագրումը պետք է իրականացվի պետական բյուջեում»,-ասաց Գ.Սահակյանը:

Նա նաև նշեց, որ երկրում կան բազում խնդիրներ, որոնք պետք է լուծվեն քայլ առ քայլ՝ բոլորի սերտ համագործակցության միջոցով:

«Մեզ անհրաժեշտ է  ջանքերի համախմբում արտաքին մարդահրավերներին դիմակայելու և առկա դժվարությունները արժանավայել հաղթահարելու համար: Մենք լի ենք վճռականությամբ ՝ապահովելու երկրի  զարգացումը և արժանավայել կյանք մեր քաղաքացիների համար: Մենք կողմնակից ենք համագործակցությանը՝ հանուն մեր քաղաքացիների բարեկեցիկ կյանքի: Իսկ մեր գերխնդիրը երկրի զարգացումն ու զորացումն է, որին հասնելու համար ունենք և՛ քաղաքական կամք, և՛ հստակ նշված ծրագրեր»,-հայտնեց ԱԺ նախագահը: