Ձեր վստահելի աղբյուրը

ՀՀ կառավարության նիստի մեկնարկից առաջ վարչապետ Հովիկ Աբրահամյանը նախարարներին հորդորեց չխուսափել լրագրողներից և հանդիպել կառավարության նիստից հետո իրենց սպասող ԶԼՄ ներկայացուցիչներին:

Նրա խոսքերով՝  կառավարության նիստից հետո լրագրողները սպասում են նախարարներին, և անթույլատրելի է, որ կառավարության անդամները հետնամուտքով են դուրս գալիս շենքից:

«Մեր կառավարությունը որդեգրել է բաց ու թափանցիկ գործելաոճ: Մենք պետք է ազնվորեն և  պարբերաբար հանրությանը ներկայացնենք մեր անելիքները, կատարած աշխատանքները՝ ակտիվորեն շփվելու զանգվածային լրատվամիջոցների ներկայացուցիչների հետ»,-նշեց Հովիկ Աբրահամյանը:

Վարչապետը բոլոր նախարարներին հորդորեց ավելի ակտիվ և նախաձեռնող լինել այս հարցերում:

«Հարկ է, որ բոլոր նախարարներն օգտագործեն թե նախապես ծրագրված, թե առաջացող բոլոր հնարավորությունները՝ առավել բաց հաղորդակցության համար: Օրինակ՝կառավարության նիստերից հետո բազմաթիվ լրագրողներ սպասում են կառավարության մուտքի մոտ: Յուրաքանչյուրս պետք է օգտագործի այս առիթը՝ հանրության հետ ևս մեկ անգամ հաղորդակցվելու, հարց պարզաբանելու համար և ոչ թե ասենք դուրս գաս այլ մուտքով»,- ասաց Հովիկ Աբրահամյանը:

Ըստ նրա՝ վերջերս անընդհատ հարցեր են բարձրացվում վարկերի մասին: Նա վարկային ծրագրեր իրականացնող բոլոր գերատեսչություններին հանձնարարեցայսօրվանից սկսած պարբերաբար հանրությանը տեցեկացնել իրականացվող ծրագրերի արդյունքների մասին՝ կոնկրետ ցուցանիշներով, ընթացքի հաջողություններով ու դժվարությոններով:

«Մենք մեր ժողովրդից թաքցնելու ոչինչ չունենք և պետք է դա ապացուցենք մեր վարքով ու գործով»,- նշեց Հովիկ Աբրահամյանը: