Ձեր վստահելի աղբյուրը

ՀՀ Ազգային ժողովում այսօր ֆինանսների նախարար Գագիկ Խաչատրյանը 2016թ. պետական բյուջեի նախագծի վերաբերյալ ամփոփիչ ելույթում նշեց, որ քննարկումների ընթացքում եղան այնպիսի առաջարկներ, որոնց ընդունումը կնպաստի 2016թ-ի բյուջետային գործընթացի արդյունավետությանը:

«Այդ առումով մենք բարձր ենք գնահատում կառուցողական երկխոսությունը և ակտիվ համագործակցությունը այնպիսի փաստաթղթի շուրջ, որը բացի 2016թ-ի հիմնական ֆինանսական փաստաթուղթը լինելուց կդառնա նաև քաղաքական փոխհամաձայնության փաստաթուղթ»,- ասաց Գագիկ Խաչատրյանը:

Ըստ նրա՝ քննարկումների ժամանակ հնչեցին նաև նպատակային քննադատություններ, որոնք կառավարության գործունեության տեսանկյունից զսպող հատկություն կունենան: Սակայն, ըստ Գ.Խաչատրյանի, դրան զուգահեռ եղան նաև անիրատեսական առաջարկներ:

«Բերվում են  առաջին հայացքից որևէ քննադատության չդիմացող, ոչ մասնագիտական համեմատականներ՝ առանց դրանց հիմքում դրված խորքային բաղադրիչները և համակողմանի պատկերը ներկայացնելու»,- նշեց նախարարը:

Գ.Խաչատրյանի խոսքերով՝ այսօր բոլոր երկրների կառավարությունները գտնվում են աննախանձելի վիճակում և քննադատելու առիթները բազմաթիվ են, սակայն կարևորն այն է, որ ժողովուրդը կառավարություններից ակնկալում է ավելի մեծ աշխատանքներ, քանր որ օրեցօր մեծանում է լավ ապրելու ցանկությունը:  

Այնուհետև ֆինանսների նախարարն անդրադարձավ ՓՄՁ սուբյեկտների գործունեության հետ կապված այն հայտարարություններին, թե ՓՄՁ-ները գնալով մասսակայան փակվում են: Ֆինանսների նախարարը ներկայացրեց պաշտոնական վիճակագրությունը: « ՓՄՁ-ների վերաբերյալ փաստն այն է, որ 2015թ. նոյեմբերի 1-ի դրությամբ հարկային մարմնում հաշվառված ՓՄՁ-ների թիվը կազմել է 67 830՝  2014 թ-ի 58 հազար 163 սուբյեկտի դիմաց: Այսինքն՝ մենք ունենք ոչ թե հարկային մարմնում հաշվառված ՓՄՁ-ների նվազում, այլ շուրջ 16,6 տոկոս աճ»,- ասաց նա:

Գ.Խաչատրյանը նաև ընդունեց, որ ձեռնարկությունները փակվում են, իսկ դրա պատճառները հետևյալն են. «Իրականացված օրենսդրական փոփոխությունները առավել քան ցայտուն կերպով հիմք են տալիս եզրահանգելու, որ ՓՄՁ-ների հնարավոր փակման ռիսկերը հարկային և օրենսդրական գործոններով պայմանավորված չեն: Կարծում ենք, որ պատճառները պետք է փնտրել կարգավորումների այլ դաշտում՝ ոչ հաշվենկատ գործունեություն, խոշորների հետ մրցակցելու սահմանափակ կարողություններ, ֆինանսական ռեսուրսների հասանելիություն, անարդյունավետ ծախսերի տնօրինում և այլն»:

Անդրադառնալով ծառայողական մեքենաների կրճատման վերաբերյալ Դանիայի հետ Հայաստանի համեմատությանը` Գ.Խաչատրյանն ասաց, որ փորձ է արվում զուգահեռներ անցկացնել մի երկրի հետ, որը ավտոմեքենաների կրճատմամբ, ինչպես նաև ավտոմեքենաների շահագործումը չխրախուսելու գործիքակազմով ձգտում է ամբողջ Եվրոպային ի ցույց դնել և ապացուցել, որ այդպես կարելի է պայքարել բնապահպանական խնդիրների դեմ: Այսինքն՝ դա արվում է ոչ թե բյուջեի տնտեսման համար, այլ բնապահապանական խնդիր է լուծում:

«Միաժամանակ հաշվի չի առնվում այն կարևոր հանգամանքը, որ Դանիայում պետական ծառայողների սոցիալական երաշխիքների, առողջապահական խնդիրների լուծման համար բազմապատիկ անգամ շատ ավելի մեծ գումարներ են ծախսվում, այդ առումով պետք է հաշվի առնել այն, որ ծառայողական մեքենաների միջոցով, մենք մեր պետական ծառայողների համար որոշակի սոցիալական խնդիրներ ենք լուծում, քանի որ նրանց աշխատավարձով հնարավոր չէ լուծել այդ խնդիրը, իսկ աշխատանքային պայմանների և ժամանակի առումով համեմատությունները նույնպես անհամադրելի են»,-ասաց նա՝ հավելելով, որ Դանիայում մեկ ժամվա համար նվազագույն աշխատավարձը կազմում է 20 դոլար, իսկ Հայաստանում՝ 330 դրամ, միջին աշխատավարձը Դանիայում կազմում է 3400 դոլար, իսկ Հայաստանում՝ 340 դոլարին համարժեք դրամ:

Նա նաև հարևան Վրաստանի օրինակը բերեց, ըստ որի՝ երկու տարվա ընթացքում նոր ծառայողական մեքենաների ձեռք բերման համար ծախսվել է 5 միլիոն դոլար:

«Այսինքն՝ կառավարությունում որևէ քայլ անելուց առաջ տիրապետում ենք գրեթե բոլոր երկրների իրողություններին և հաշվի ենք առնում միջազգային փորձը»,- ընդգծեց նախարարը:

Գ.Խաչատրյանն անդրադարձավ նաև հարկային օրենսգրքին: Ըստ նրա՝ մշակվել է նոր օրենսգիրք, որը վերլուծել է վերջին 20 տարիների ընթացքում հարկային օրենսդրության խութ մասերը, բացի այդ ուսումնասիրվել է տարածաշրջանային բոլոր երկրների, միջազգային փորձը« Այն տեղադրված է ֆինանսների նախարարության կայքում:

«Սակայն հաճախ լսում ենք քննադատություններ, թե  ՓՄՁ-ների միությունները քննարկումներում ներգրավված չեն: Մենք պատրաստ ենք քննարկել բոլոր հարցերը այն կոմպետենտ միություների շահագրգիռ անձանց, հասարակական կազմակերպությունների հետ, որոնց հետ իմաստ ունի քննարկելը»,- ընդգծեց նա։

Ֆինանսների նախարարն ասաց նաև, որ պետական բյուջեի փաստաթղթի քննարկումը չպետք է պատեհ առիթ դարձնել նեղ անձնական շահերին ծառայեցնելու, հասարակության համար ականջահաճո հայտարարություններով հանդես գալու համար:

«Իրականում պատկերն այն է, որ մենք բոլորս գիտակցում ենք խնդիրները, բայց խոսում ենք խնդիրերի մասին՝ իրար չլսելով: Կարծում եմ՝ պետք է հաշվի առնել այն հանգամանքը, որ ինչպես մտահոգությունները, այնպես էլ պատասխանատվությունը ոչ միայն կառավարությանն է, այլ՝ բոլորինը»,- նշեց Գ.Խաչատրյանը:

Եզրափակելով խոսքը, ֆինանսների նախարարն ասաց, որ 2016թ. պետական բյուջեին տարբեր բնորոշումներ տրվեցին, սակայն իր բնորոշմամբ, այն հնարավորությունների դրսևորման բյուջե է՝ անկախ քաղաքական ցանկություններից: