Ձեր վստահելի աղբյուրը

Օտարերկրյա պետությունները հաճախ են հետաքրքրվում մշակութային զբոսաշրջության զարգացմամբ, հասկանում են, որ այն լուրջ ներուժ է այս կամ այն երկրի հետ կապերը զարգացնելու ուղղությամբ: «Իմ Հայաստանը» ծրագրի մեկնարկին լրագրողների հետ զրույցում նշեց ՀՀ մշակույթի նախարար Հասմիկ Պողոսյանը:

«Իմ Հայաստանը» ծրագրի շրջանակում, ըստ նախարարի, բարեկարգվելու են պատմամշակութային հուշարձաններ, ամենկարևորը՝ ստեղծվելու են ենթակառուցվածքներ, որոնք սպասարկելու են հուշարձանները:

«Մենք ինչ-որ չափով կարողանում ենք իրականացնել հուշարձանների վերականգնում, բայց ենթակառուցվածքների մասով խնդիր ունենք: Այդ հարցը մշտապես գտնվում է ուշադրության կենտրոնում: Պետք է հուշարձանները լիարժեք պատրաստ լինեն ընդունելու զբոսաշրջիկներին»,- ասաց մշակույթի նախարարը՝ հավելելով, որ հուշարձանների մոտ  տեղադրվելու են նաև ցուցանակներ, լինելու են տեղեկատվական կենտրոններ, համապատասխան անձնակազմեր, կայանատեղիներ, դիտակետեր:

Հ. Պողոսյանի խոսքով, ծրագիրը կնպաստի զբոսաշրջիկների թվի աճին, քանի որ զբոսաշրջիկի համար կարևոր է հարմարավետությունը:

«Ես չեմ հիշում վերջին տարիներին իրականացված որևէ մի ծրագիր, որտեղ այսպիսի լուրջ մոտեցում կա պետության և մասնավորի ներդրումների կողմից»,- ասաց մշակույթի նախարար Հ.Պողոսյանը:

ԱՄՆ Միջազգային զարգացման գործակալության և Սմիթսոնյան ինստիտուտի համագործակցության շրջանակում Հայաստանում այսօրվանից մեկնարկում է նորարարական ծրագիր՝ «Իմ Հայաստան», որը միտված է խթանելու ազգային մշակույթի պահպանումը՝ երկրում մշակութային զբոսաշրջության զարգացման միջոցով: Չորս տարի տևողության ծրագրի արժեքն է հինգ միլիոն դոլար: