Ձեր վստահելի աղբյուրը

Հայ դերասնանները ռուս հանդիսատեսի կողմից մեծ ջերմությամբ են ընդունվել և մեծ հաջողություններ են ունեցել: Լրագրողների հետ հանդիպման ժամանակ ասաց Երևանի Կ. Ստանիսլավսկու անվան պետական ռուսական դրամատիկական թատրոնի  գեղարվեստական ղեկավար Ալեքսանդր Գրիգորյանը:

Նշենք, որ թատրոնը նոյեմբերի 1-17-ը  մասնակցել է Մոսկվայում կայացած «Սմոտրինի» («Смотрины») ժամանակակից ռուսական դրամայի միջազգային փառատոնին՝ նվիրված ռուս ժամանակակից գրող, դրամատուրգ, «Լիտերատուրնայա գազետա» շաբաթաթերթի գլխավոր խմբագիր Յուրի Պոլյակովի ստեղծագործական ժառանգությանը, նաև Մոսկվայում անցկացված «Մեծ հյուրախաղեր-2015» ծրագրին: 

Նա տեղեկացրեց, որ նոյեմբերի 10-ին Մոսկվայի Սվետլանա Վրագովայի «Մոդեռն» թատրոնի բեմում ռուսական դրամատիկական թատրոնը ցուցադրել է «Աֆրոդիտեի ձախ կուրծքը» (ըստ Յու. Պոլյակովի պիեսի) ներկայացումը (նոր կազմով)`իր բեմադրությամբ: Ալեքսանդր Գրիգորյանի խոսքով, հանդիսատեսը ջերմությամբ է ընդունել հայ դերասանների խաղը, բարձր գնահատականի է արժանացել ռեժիսորական աշխատանքը և ՀՀ վաստակավոր արտիստներ Ֆրեդ Դավթյանի, Սերգեյ Մագալյանի աշխատանքները:

Նշենք, որ «Աֆրոդիտեի ձախ կուրծքը» ներկայացման առաջնախաղը կայացել է 2008թ.-ին:

«Սմոտրինի» փառատոնին այս տարի ցուցադրվել է 13 ներկայացում՝ հետևյալ թատրոնների մասնակցությամբ. Նիժիգորոդի մարզային դրամատիկական թատրոն, Կիրովի մարզային դրամատիկական թատրոն, Պենզայի մարզային դրամատիկական թատրոն, Երևանի ռուսական դրամատիկական թատրոն (Հայաստան), Վասիլևսկի պետական դրամատիկական թատրոն, Կեչկեմտ քաղաքային թատրոն (Վենգրիա), Հարավ-ղազախական ռուսական դրամատիկական թատրոն (Ղազախստան), Սիմֆերոպոլի ռուսական դրամատիկական թատրոն, Մոսկվայի Գորկու անվան գեղարվեստական թատրոն, «ՍամԱրտ» Սամարայի պատանի հանդիսատեսի թատրոն, «Ժավորոնկի» թատերական կենտրոն, Մոսկվայի «Մոդեռն» թատրոն, Ռուսական բանակի կենտրոնական ակադեմիական թատրոն, Բալթիական նավատորմի դրամատիկական թատրոն, Իրկուտսկի ակադեմիական դրամատիկական թատրոն, Տուլայի դրամայի ակադեմիական թատրոն, Վոլգոգրադի «ՆԷՏ» թատրոն, Մոսկվայի Սատիրայի ակադեմիական թատրոն: Փառատոնի նախագահն է Յուրի Պոլյակովը:

Նոյեմբերի 12-13-ին Կ. Ստանիսլավսկու անվան պետական ռուսական դրամատիկական թատրոնը մասնակցել է նաև Մոսկվայում անցկացված «Մեծ հյուրախաղեր-2015» ծրագրին, որի շրջանակում ցուցադրել է «Կրքեր ըստ ռևիզորի» (հեղինակ՝ Ն. Գոգոլ, բեմադրությունը՝ Ա. Գրիգորյանի) և «Ամեն ինչ վաճառվում է» (հեղինակ՝ Ա. Օստրովսկի, բեմադրությունը՝ Ա. Գրիգորյանի) ներկայացումները:
Մոսկվայի Կինոդերասանի թատրոնի բեմում, ըստ Ա. Գրիգորյանի, հայ դերասանները նույնպես մեծ հաջողություն են ունեցել:

«Մեծ հյուրախաղեր» ծրագիրն անցկացվում է ՌԴ մշակույթի նախարարության, Մոսկվայի մշակույթի դեպարտամենտի և Հյուրախաղային գործունեության աջակցման համերկրային կենտրոնի աջակցությամբ: «Մեծ հյուրախաղեր» ծրագիրն իր մեջ ամփոփում է ոչ միայն ՌԴ, այլ նաև ԱՊՀ երկրների տարածքում գտնվող ռուսական թատրոնների հյուրախաղեր՝ ՌԴ տարածքով: