Ձեր վստահելի աղբյուրը

Գլխավոր պողոտայի՝ Սարյան փողոց-Մաշտոցի պողոտա միջանկյալ հատվածի այգու («Մալիբու» սրճարանին հարակից հանգստի գոտի) բարեկարգման աշխատանքներն ընդլայնվել են. արդեն մի քանի օր է ապամոնտաժվում է նաև «Մալիբու» սրճարանը: Շինհրապարակն ընդգրկել է նաև այգու այն հատվածը, որտեղով մարդիկ էին անցուդարձ անում:

Ավելի վաղ  Panorama.am-ին Երևանի քաղաքապետարանի տեղեկատվության և հասարակայնության հետ կապերի վարչության պետ Արթուր Գևորգյանն ասել էր, որ մինչև տարեվերջ բարեկարգման աշխատանքները կավարտվեն, այգին կհանձնվի բնակիչներին: Սակայն Երևանի 2016 թ. զարգացման ծրագրի նախագծում նշված է. «2016 թվականին նախատեսվում է ավարտել Գլխավոր պողոտայի` Սարյան փողոցի և Մաշտոցի պողոտայի հատվածի վերակառուցման աշխատանքները»:

Նշենք, որ այգու բարեկարգման աշխատանքներն իրականացնում է «Տաշիր գրուպ» ընկերությունը:
Ծրագրի շրջանակում կբարեկարգվի այգու 18846 քմ ընդհանուր մակերեսը, կապահովվի ժամանակակից լուծումներով արտաքին լուսավորություն, կփոխարինվեն ճեմուղիների և աստիճանների սալահատակները:

Քաղաքապետարանից հավատացրել էին նաև, որ իրականացվող ծրագրի արդյունքում այգու ներկայիս կանաչ մակերեսը զգալիորեն կընդլայնվի, կավելանա նաև ջրային մակերեսը: Հենաշարժողական խնդիրներ ունեցող անձանց համար այգին մատչելի ու հարմարավետ դարձնելու նպատակով էլ կկառուցվեն թեքահարթակներ:

Բարեկարգման ավարտից հետո, ըստ նախագծի, այգին ունենալու է այսպիսի տեսք.