Ձեր վստահելի աղբյուրը

Այսօր Փարիզում Եվրոպայի խորհրդի խորհրդարանական վեհաժողովի Սոցիալական, առողջապահության և կայուն զարգացման հանձնաժողովի նիստի օրակարգում ընդգրկված է նաև Լեռնային Ղարաբաղի Սարսանգի ջրամբարի վերաբերյալ զեկույցի նախագիծը,  որի զեկուցողն է Բոսնիա և Հերցեգովինան ներկայացնող պատգամավոր Միլիցա Մարկովիչը։

Զեկույցը վերնագրված է «Ադրբեջանի սահմանամերձ շրջանների բնակիչները միտումնավոր զրկված են ջրից»։  Նախատեսվում է, որ  հանձնաժողովի նիստում կընդունվի զեկույցի նախագիծը։

Միլիցա Մարկովիչը զեկույցը պատրաստելու ընթացքում փաստահավաք այցով եղել է Ադրբեջանում։ Սակայն  զեկուցողը տարբեր պատրվակներով չէր ցանկանում ուղիղ կապ հաստատել Ղարաբաղի իշխանությունների հետ և այցելել ԼՂ, որտեղ և գտնվում է Սարսանգի ջրամբարը։

Նոյեմբերի 16-ին վերջապես ԼՂՀ ԱԳՆ-ն նամակ է ստացել ԵԽԽՎ քարտուղարությունից՝  Սարսանգի ջրամբարի հարցով ԵԽԽՎ զեկուցող Միլիցա Մարկովիչի՝ ԼՂՀ կատարելիք այցին աջակցելու խնդրանքով։ Պատասխան նամակում նշվել էր, որ չնայած զեկույցի անվանման և նրա պատրաստման գործընթացի առնչությամբ ունեցած լուրջ վերապահումներին ու նկատառումներին, ԼՂՀ իշխանությունները պատրաստ են ԵԽԽՎ-ի հետ համագործակցությանը:

Սակայն,  հնարավոր է, որ այս «համագործակցությանն» այլևս անհրաժեշտություն չլինի, և այցն արդեն ուշացած լինի, եթե հանձնաժողովի նիստում ընդունվի զեկույցի նախագիծը։

Հիշեցնենք, որ ԵԽԽՎ-ում Սարսանգի ջրամբարի հարցը Ադրբեջանի պատգամավորները բարձրացրեցին  2014թ․-ի ԵԽԽՎ գարնանային նստաշրջանում՝ նշելով, որ «երկար տարիներ՝ հատկապես գարնանն ու ամռանը, Ադրբեջանի սահմանամերձ գոտիների ոռոգումը կատարվել է Թարթառ գետի վրա կառուցված Սարսանգի ջրամբարից, ինչը ներկայումս ամառվա ամիսներին դադարեցվում է և հումանիտար խնդիրներ առաջացնում բնակիչների համար։»։  ԵԽԽՎ Բյուրոն 2014թ․-ի ապրիլին  որոշում  կայացրեց ընթացք տալ Ադրբեջանի՝ Լեռնային Ղարաբաղի Սարսանգի ջրամբարի հետ կապված նախաձեռնությանը և նշանակվեց զեկուցող՝ ջրամբարի վերաբերյալ զեկույց պատրաստելու համար։ 

Նշենք նաև, որ սա առաջին անգամը չէր, որ ադբեջանցիները միջազգային ատյաններում և նաև ԵԽԽՎ-ում բարձրացնում էին Սարսանգի ջրամբարի հարցը։  2013թ-ի ԵԽԽՎ աշնանային նստաշրջանում ադրբեջանցիները ևս բարձրացրել էին Սարսանգի ջրամբարի հարցը, սակայն Բյուրոն, ով իրավունք ունի առաջարկվող նախաձեռնություններին ընթացք տալ, կասեցնել կամ ընդունել որպես ի գիտություն, Ադրբեջանի՝ Սարսանգի վերաբերյալ բանաձևի նախաձեռությունն ընդունել էր որպես «Ի գիտություն»։