Եվրոպական ներդրումային համաժողովին կներկայացվի ազգությամբ հայ մասնագետների կողմից ստեղծված ինովացիոն գործիքը
Նոյեմբերի 26-27-ը Լոնդոնում տեղի կունենա CFA (Chartered Financial Analyst) ինստիտուտի ամենամյա Եվրոպական ներդրումային համաժողովը, որտեղ կներկայացնի ազգությամբ հայ մասնագետներ Գևորգ Օդաբաշյանի և Արտավազդ Կարդաշյանի կողմից ստեղծված GeWorko ինովացիոն գործիքը: Այս մասին տեղեկացնում է IFC Markets կազմակերպության հայաստանյան ներկայացուցիչ Հռիփսիմե Հայրապետյանը:
Մեթոդի համահիմնադիրներն են «IFCM Group» ընկերության Գլխավոր տնօրեն Գևորգ Օդաբաշյանն ու Տեղեկատվական տեխնոլոգիաների գծով տնօրեն Արտավազդ Կարդաշյանը։ Ըստ հեղինակների՝ GeWorko մեթոդի յուրահատկությունը նրանում է, որ նրա շնորհիվ հնարավոր է դառնում ստեղծել և ֆինանսական շուկաներում ներդրում կատարել տարատեսակ ակտիվներից բաղկացած պորտֆելներով, որոնք համադրելով հնարավոր է տեսնել մեկի արժեքորոշիչը մյուսի նկատմամբ։ Պորտֆելները կարող են բաղկացած լինել արժույթներից, տարբեր շուկաների արժեթղթերից, ինդեքսներից, ապրանքներից։ Մեթոդն իր տեսակով նման է արտարժութային շուկայում իրականացվող գործարքների գաղափարին, երբ մի ակտիվն արժենշվում է մեկ ուրիշով։ Պորտֆելային ներդրումն, այս տեխնոլոգիայի համաձայն, իրականացվում է երկու պորտֆելի հիման վրա, այսինքն՝ մի պորտֆելը հանդես է գալիս որպես բազային մաս, իսկ մյուսը՝ արժեքորոշիչ։
GeWorko մեթոդը մշակվել է պրոֆեսիոնալ թրեյդերների համար, որոնք ներդրումային գործարքներ իրականացնելիս լրացուցիչ վերլուծության կարիք ունեն։ Ներկայումս այս մեթոդը կիրառելի է միայն NetTradeX առևտրային հարթակում։
CFA ինստիտուտի համաժողովին, որը նվիրված է տարածաշրջանում 2015 թվականի առավել արդիական տնտեսական զարգացումներին, կմասնակցեն աշխարհի 54 երկրներից պատվիրակություններ՝ Եվրոպայի առաջատար պորտֆելային մենեջերներ, վերլուծաբաններ, ներդրողներ և տարբեր ընկերությունների ղեկավարներ։
CFA (Chartered Financial Analyst – դիպլոմավորված ֆինանսական վերլուծաբան) ինստիտուտը, որը ստեղծվել է 1962 թվականին, պրոֆեսիոնալ ներդրողների համաշխարհային ասոցիացիա է։
Ինստիտուտը ֆինանսների և ներդրումների ոլորտում շնորհում է աշխարհի ամենահեղինակավոր հավաստագիրը։ CFA ինստիտուտի կենտրոնական գրասենյակները գտնվում են Նյու Յորքում, Լոնդոնում, Հոնգկոնգում, Մումբայիում և Շարլոտսվիլում (ԱՄՆ)։ 2014 թվականի դրությամբ՝ ասոցիացիայի կազմում են գտնվում 120 000 ներդրողներ և ֆինանսիստներ։
«IFCM Group»-ն ընկերությունների խումբ է, որն ավելի քան 10 տարի զբաղվում է ֆինանսական տեխնոլոգիաների բնագավառում նոր և արդյունավետ նախագծերի մշակմամբ և իրագործմամբ։