Ձեր վստահելի աղբյուրը

Պրոբացիոն ծառայության մասին օրենքի նախագծում կա դրույթ էլեկտրոնային հսկողության մասին. շահառուի կամ դատապարտյալի նկատմամբ էլեկտրոնային հսկողություն կիրառվելու է դատարանի որոշմամբ, որն ընդունելիս պետք է հաշվի առնել անձի տարիքը, սոցիալական դրությունը, առողջական վիճակը, զբաղմունքի տեսակը և այլն:

Այսօր կազմակերպված քննարկման ժամանակ ՀՀ արդարադառության նախարարի տեղակալ Սուրեն Քրմոյանն ասաց, որ բազմաթիվ քննարկումներ են ունեցել էլեկտրոնային հսկողության ֆինանսավորման հետ կապված:

«Այդ ծառայությունը, սարքը, համակարգը պահելը բավականին թանկ է: Մի մեխանիզմ ենք նախատեսել, որը դեռևս պետք է քննարկվի՝ արդյո՞ք նպատակահարմար է, թե՞ ոչ: Նախատեսել ենք, որ դատարանը որոշում  կկայացնի՝ արդյո՞ք էլեկտրոնային հսկողություն իրականացվելու է տվյալ անձի, թե՞ պետության միջոցների հաշվին»,- ասաց նա՝ միաժամանակ հավելելով, որ տվյալ անձի ֆինանսական դրությունից ելնելով դատարանը չի կարող չնշանակել էլեկտրոնային հոսկողություն, եթե, իհարկե, դրա անհրաժեշտությունը կա,  ու որպես խափանման միջոց ընտրել կալանավորումը:

«Փաստաբանները հաճախ միջնորդում են՝ իրենց պաշտպանյալների նկատմամբ կիրառել գրավ: Այս պարագայում կարող է միջնորդություն անել՝ կիրառել այլընտրանքային խափանման միջոց,  պատրաստ են փոխհատուցել էլեկտրոնային հսկողության հետ կապված ծախսերը»,- հավելեց Ս. Քրմոյանը:

Նա նաև նշեց, որ տարբեր երկրներում այդ ծառայության մեկ օրվա արժեքն է՝ 5 եվրո կամ 5 դոլար: Հայաստանում, ըստ փոխնախարարի, ծառայության վարձը կլինի 1000 դրամ:

Մաժամանակ Ս. Քրմոյանն ասաց, որ այսօր քրեակատարողական հիմնարկներում մեկ անձին պահելու համար օրական 5000-6000 դրամ է տրամադրվում: