Ձեր վստահելի աղբյուրը

Այսօրվա դրությամբ հանրապետությունից արտահանվել է 70200 տոննա պտուղ-բանջարեղեն, ինչը նախորդ տարվա համեմատ 68 տոկոսով ավելի է:  Այս մասին այսօր լրագրողների հետ հանդիպման ժամանակ ասաց ՀՀ գյուղատնտեսության նախարարի տեղակալ Ռոբերտ Մակարյանը:

Ըստ նրա՝ արտահանված պտուղ-բանջարեղենի 84 տոկոսը կամ 58900 տոննան արտահանվել է Ռուսաստանի Դաշնություն, 10800 տոննան՝ Վրաստան: Հայաստանից պտուղ-բանջարեղեն արտահանվել է նաև Արաբական միացյալ էմիրություններ, Իրան, Լեհաստան, Քուվեյթ, Չեխիա, Ղազախստան և Բելառուս: 

Ընդհանուր առմամբ՝ Հայաստանից արտահանվել է 11 հազար տոննա խաղող, 21300 տոննա ծիրան, 3045 տոննա սալոր, 2200 տոննա կեռաս, 1270 տոննա խնձոր:

«Գյուղացիական տնտեսությունները դժգոհում են, որ չեն կարողանում խնձոր իրացնել, սակայն արդեն արտահանվել է 1270 տոննա խնձոր, մինչդեռ նախորդ տարի արտահանման ծավալը կազմել է 29 տոննա խնձոր»,- ասաց Ռ.Մակարյանը:

Նա նաև նշեց, որ կաղամբի և ծաղկակաղամբի իրացման հետ կապված ևս դժգոհություններ կան, սակայն այսօրվա դրությամբ հանրապետությունից արտահանվել է 10200 տոննա կաղամբ և ծաղկակաղամբ՝ նախորդ տարվա 2000 տոննայի դիմաց:

Ի դեպ, այս տարի աճել են նաև կանաչեղենի, բողկի արտահանման ծավալները. եթե նախորդ տարի հանրապետությունից արտահանվել է  900 տոննա կանաչեղեն, ապա այս տարի՝  1500 տոննա: Ինչ վերաբերում է բողկի արտահանման ծավալներին, ապա այս տարի արտահանվել է 2900 տոննա բողկ՝ նախորդ տարվա 860 տոննայի դիմաց: 

Ինչ վերաբերում է լոլիկի արտահանմանը, ապա, ըստ Ռ.Մակարյանի,  այսօրվա դրությամբ արտահանվել է 1280 տոննա, ինչը շուրջ 6 անգամ գերազանցում է նախորդ տարվա նույն ժամանակահատվածի մակարդակը: Բացի այդ, այս տարի արտահանվել է 3700 տոննա վարունգ, մինչդեռ նախորդ տարի արտահանման ծավալը կազմել է 220 տոննա:

«Արտահանումը շարունակվում է և մինչև տարեվերջ ծավալները կավելալան»,- ասաց փոխնախարարը: