Ձեր վստահելի աղբյուրը

Թուրքիայի կողմից ռուսական ռազմական ինքնաթիռը խոցելուց հետո թե փորձագիտական և թե ռուսական լրատվական դաշտում տեսակետներ շրջանառվեցին այն մասին, որ Թուրքիայի կողմից ռուսական ինքնաթիռի խոցումը կարող էր Էրդողանի կողմից նախապես պլանավորված գործողություն լինել:

Մասնավորապես ՝ «Комсомольская правда»  թերթի էլեկտրոնային ռեսուրսում դեռ այս տարվա հոկտեմբերի 19-ին հրապարակված «Էրդողանը հակամարտություն է հրահրում Ռուսաստանի և Թուրքիայի միջև» վերտառությամբ հոդվածում   հեղինակ, հրապարակախոս Իսրայել Շամիրը, հղում անելով Թուրքիայում հայտնի «fautavni» ծածկանունով թվիթերում  հանդես եկող բլոգերին, գրել էր, որ Էրդողանը մի արկածախնդրություն է նախաձեռնել, որը նրան պետք է օժանդակի նախընտրական արշավի ժամանակ ձախողումից խուսափելու համար:

«Նախագահ Էրդողանը պատրաստվում է ռուսական ինքնաթիռներ խոցել Սիրիայում, որպեսզի Ռուսաստանի և Թուրքիայի հարաբերությունը հասցնի պատերազմական շեմի: Դա պետք է նրան օգնի նախընտրական արշավի ժամանակ՝ այդ կերպ խուսափելով հնարավոր քաղաքական ձախողումներից: Նման մտահոգիչ հայտարարություններով է հանդես եկել հայտնի fuat avni ծածկանունով բլոգերը: Մեր աղբյուրները Թուրքիայում հավատում են, որ Էրդողանը վախենալով իր քաղաքական ձախողումներից կարող է  երկիրը հասցնել պատերազմական վիճակի՝ խոցելով Սիրիայի երկնքում ռուսական ինքնաթիռներ և պատճառաբանելով, թե վերջիններս խախտել են օդային տարածքը»,- իր հոդվածում գրել էր КП-ի լրագրող Իսրայել Շամիրը:

Վերջինս նույն այդ հոդվածում հղում անելով Թուրքիայում աշխատող և կառավարական շրջանակներում տեղեկություններին հասանելիություն ունեցող իր աղբյուրին՝ հավելել էր, որ Էրդողանը անհարմար վիճակում է հայտնվել, քանի որ նրա նկատմամբ մեծ ճնշումներ են սկսել Քաթարն ու Սաուդիան Արաբիան՝ այն բանից հետո, երբ նրանց գումարներով կազմավորված սիրիական ընդդիմության ուժերը ընկրկում են Սիրիայի կառավարական բանակի առաջ:

Եվ ահա այս հրապարակումից գրեթե մեկ ամիս անց՝ նոյեմբերի 24-ին Թուրքիայի զինուժը սիրիական Լաթաքիայի շրջանում խոցում է ռուսական Су-24 ռազմական ինքնաթիռը: Դեպքից ժամեր անց նույն «Комсомольская правда»  թերթում լույս է տեսնում լրագրող Դարյա Ասլամովայի «Կոմսոմոլկա թերթը զգուշացրել էր, որ Էրդողանը պատրաստվում է մեր ինքնաթիռը խոցել» վերտառությամբ հոդված:

Սույն հրապարակման մեջ արդեն լրագրողը բացում է փակագծերը՝ նշելով, որ Էրդողանի պլանների մասին իրեն մեկ ամիս առաջ Թուրքիայում ապրող իր ընկերն էր տեղեկացրել, որի համար այդ տեղեկությունը հայթհայթել էր նույն fuat avni ծածկանունով հանդես եկող բլոգերը, ով լրագրողի ընկերոջ խոսքով, տարիներ շարունակ Էրդողանի կառավարությունում տեղեկություններ է հավաքագրում, հաջողությամբ մնալով աննկատ:

Շարունակելով, լրագրողը մանրամասնում է, որ այդ տեղեկությունը ստանալու պահին Թուրքիայում աշխատելիս է եղել և իր կյանքին ամիջական սպառնալիք զգալու վախից ելնելով տեղեկությունը չի հրապարակել:

«Բայց ես արեցի ամեն հնարավորը: Նամակը, որն ինձ ուղարկել էր ընկերս, ես ուղարկեցի իմ մյուս ազդեցիկ ընկներներին, ինչպես նաև միջազգային մամուլին, որոնցից և ոչ մեկն էլ ռիսկի չգնաց ու այն չհրապարակեց: Իմ խիղճը մաքուր է, մեր ընդհանուր ընկեր Իսրայել Շամիրը Կոմսոմոլսկայա պրավդայում նախազգուշացնող հոդվածով հանդես եկավ»-գրում է լրագրողը՝ մատնանշելով վերևում նշված թերթի հոկտեմբերի 19-ի հրապարակումը:

Շարունակելով, լրագրողը նոր բացահայտումներ է անում, նշելով, որ հիմա՝ արդեն դեպքից հետո, երբ վերադարձել է Սիրիայից և Իրաքից, իրեն իրաքցի հայտնի քաղաքագետ Ռամազան Օսմանովը հայտնել էր. «Թուրքիայի կառավարությանը մոտ կանգնած գաղտնի աղբյուրներից ես տեղեկացել եմ, որ Էրդողանը Սիրիայում լայմանասշտաբ օպերացիա է ուզում սկսել՝ որպես պատճառ բերելով այն, որ մտադիր է փրկության հասնել Սիրիայի թուրքմեններին և փախստականների համար ստեղծել բուֆերային գոտի: ԱՄՆ նրան այդ արկածախնդրության մեջ օգնություն է խոստացել: Ռուսաստանի և Թուրքիայի շահերը բախվելու են սիրիական դաշտում»:

Ավարտելով հրապարակումը, լրագրողը մտահոգություն է հայտնում, որ իրեն այս տեղեկությունները հաղորդած իր ընկերոջ ճակատագիրը այս պահին վտանգված է Թուրքիայում:

fuat avni ծածկանունով հանդես եկող օգտատերը համարվում է իշխող «Արդարություն և զարգացում» կուսակցության անդամներից, ով հասանելիություն ունի կառավարության ներքին, կուլիսային գործընթացները: Նրա գրառումների մի մասն այս կամ այն կերպ իրականություն է դարձել: Օգտատերը դեռ նախորդ տարի էր գրառումներ արել    ընդդիմադիր մամուլի նկատմամբ Թուրքիայի կառավարության պլանավորված գործողությունների մասին, որոնք կարճ ժամանակ անց իրականություն դարձան: Օգտատիրոջ վերջին հրապարակումն էլ վերաբերվում է Թուրքիայի նախագահ Էրդողանի որդու՝ Բիլալ Էրդողանի, զինված թիկնապահների ուղեկցությամբ  Իտալիա փախչելու և իր հետ միլիարդավոր դոլարներ երկրից տանելուն: