Հայաստանի ֆուտբոլի ազգային հավաքականում հանդես եկող ֆուտբոլիստները տարկետում կստանան

Հասարակություն 09:51 26/11/2015

Հայաստանի ֆուտբոլի ազգային հավաքականում հանդես եկող ֆուտբոլիստները տարկետում կստանան

Հայաստանի ֆուտբոլի ազգային հավաքականում հանդես եկող ֆուտբոլիստները տարկետում կստանան պարտադիր զինվորական ծառայության զորակոչից: Այս մասին որոշման նախագիծը ընդգրկված է ՀՀ կառավարության այսօրվա նիստի օրակարգում:

Հայաստանի ազգային հավաքականի կիսապաշտպան Արաս Իհսանի Օզբիլիզը պարտադիր զինվորական ծառայության զորակոչից տարկետում կստանա մինչև 2016 թվականի ձմեռային զորակոչը: Արտակ Ալեկսանյանը, Սևակ Ագրամանյանը, Արտյոմ Սիմոնյանը, Մարտին Գևորկյանը և Սերոբ Գրիգորյանը տարկետում կստանան մինչև 2017 թվականի ձմեռային զորակոչը. բոլորը հաշվառված են Կենտրոնի տարածքային զինվորական կոմիսարիատում:

Կառավարության մեկ այլ որոշմամբ՝ Հիրաչ Յագանի, Վարանթ Բեզդիկյանի, Լևոն Հայրապետյանի և Սերգիյ Օգանեսյանի 27 տարեկանը լրանալու կապակցությամբ նրանք ազատվելու են պարտադիր զինվորական ծառայությունից:

«Հրաչ Յագանը, Լևոն Հայրապետյանը, Վարանթ Բեզդիկյանը և Սերգիյ Օգանեսյանը հանդես են գալիս ֆուտբոլի Հայաստանի Հանրապետության հավաքական թիմում, աչքի են ընկնում արդյունավետ խաղով, և ՀՀ սպորտի և երիտասարդության հարցերի նախարարությունը կարևորում է նրանց մասնակցության ապահովումը ֆուտբոլի հավաքական թիմի սպասվելիք խաղերին։ Նախագծի ընդունումը պայմանավորված է ֆուտբոլի 2016 թվականի Եվրոպայի առաջնության նախընտրական փուլերին Հայաստանի ֆուտբոլի ազգային հավաքական թիմի առաջատար ֆուտբոլիստների մասնակցության ապահովման անհրաժեշտությամբ»,- նշված է նախագծի հիմնավորման մեջ:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: