Սարսանգի վերաբերյալ 1 էջանոց ԵԽԽՎ զեկույցը «պահանջում է» հայկական զինված ուժերի դուրս բերում
Նոյեմբերի 23-ին Փարիզում Եվրոպայի խորհրդի խորհրդարանական վեհաժողովի Սոցիալական, առողջապահության և կայուն զարգացման հանձնաժողովը հավանություն տվեց Լեռնային Ղարաբաղի Սարսանգի ջրամբարի վերաբերյալ զեկույցի նախագծին, որի զեկուցողն է Բոսնիա և Հերցեգովինան ներկայացնող պատգամավոր Միլիցա Մարկովիչը։
Հակահայկական այս զեկույցը վերնագրված է «Ադրբեջանի սահմանամերձ շրջանների բնակիչները միտումնավոր զրկված են ջրից»։ Զեկույցը նախօրեի երեկոյան է միայն հրապարակվել ԵԽԽՎ պաշտոնական կայքում։
Զեկուցողի կողմից «քաղաքական պատվերի կատարումն» ակնհայտ է դառնում զեկույցի առաջին իսկ տողերից։ Մարկովիչը սոցիալական և հումանիտար խնդիրներին մանրամասնորեն անդրադառնալու փոխարեն ընդամենը 1 էջանոց զեկույցում «պահանջում է հայկական ուժերի անհապաղ դուրս բերում մտահոգիչ տարածաշրջանից»։
Գրեթե այսպիսի տողերով է սկսվում նաև ԵԽԽՎ-ի ձմեռային նստաշրջանի օրակարգում ընդգրկված, ամբողջությամբ ադրբեջանական դիրքորոշումն արտահայտող բրիտանացի պատգամավոր Ռոբերտ Ուոլտերի՝ «Բռնությունների աճը Լեռնային Ղարաբաղում և Ադրբեջանի մյուս գրավյալ տարածքներում» զեկույցը։
Միլիցա Մարկովիչը զեկույցում գրել է, որ «կանխամտածված արհեստական բնապահպանական ճգնաժամի ստեղծումը պետք է դիտվի որպես «շրջակա միջավայրի ագրեսիա» և որպես թշնամական քայլ մեկ պետության կողմից մյուս պետության հանդեպ, որի նպատակն է բնապահպանական աղետի գոտիների ստեղծումը և տվյալ տարածքներում բնակչության նորմալ ապրելն անհնար դարձնելը»,- ասվում է զեկույցի նախագծում։
Նշվում է, թե «ավելի քան 20 տարի Սարսանգի ջրամբարի, որը գտնվում է Հայաստանի կողմից բռնագրավված Ադրբեջանի տարածքում, կանոնավոր տեխնիկական սպասարկման պակասի պատճառով այն վտանգ է ներկայացնում ողջ սահմանամերձ շրջաններին», որը կարող է հանգեցնել խոշոր աղետի՝ մարդկային բազում զոհերով, և մարդասիրական ճգնաժամի։
Զեկույցի նախագիծը ափսոսանք է հայտնում, որ «Լեռնային Ղարաբաղի և հարակից տարածքների օկուպացիան Հայաստանի կողմից նմանատիպ մարդասիրական և բնապահպանական խնդիրներ է առաջացնում Ադրբեջանի բնակիչների համար»։
Զեկուցողը «Հայաստանի կառավարությունից պահանջում է դադարեցնել ջրային ռեսուրսների օգտագործումը որպես քաղաքական ազդեցության կամ ճնշման գործիք»։
Նշենք, որ Միլիցա Մարկովիչը զեկույցը պատրաստելու ընթացքում փաստահավաք այցով 2 անգամ եղել է Ադրբեջանում։ Սակայն զեկուցողը տարբեր պատրվակներով չէր ցանկանում ուղիղ կապ հաստատել Ղարաբաղի իշխանությունների հետ և այցելել ԼՂ, որտեղ և գտնվում է Սարսանգի ջրամբարը։
Հանձնաժողովում ՀՀ պատվիրակները, դեմ արտահայտվելով զեկույցի նախագծին, նշել են, որ Հայաստանը կներկայացնի հատուկ կարծիք, որը կկցվի փաստաթղթին։
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
