Ձեր վստահելի աղբյուրը

ԳԱԱ պատմության ինստիտուտի տնօրեն Աշոտ Մելքոնյանը խորհուրդ է տալիս չոգևորվել Հայոց ցեղասպանության ժխտումը քրեականացնող օրինագիծը ՌԴ Պետդումա ներկայացնելուց:

«Ցեղասպանության վերաբերյալ տարբեր որոշումների, հայտարարությունների, օրինագծերի վերաբերյալ խանդավառ չեմ այն իմաստով, որ հատուցման հասնելու ճանապարհին նպատակային առումով մեզ համար օգտակար չեն»,-Panorama.am-ի հետ զրույցում իր կարծիքն այսպես բանաձևեց Ա. Մելքոնյանը:

Նա նկատեց, որ վերջին 50 տարվա ընթացքում ավելի քան 25 երկիր ճանաչել ու դատապարտել է Հայոց ցեղասպանությունը, միջազգային իրավունքի տեսանկյունից Փերինչենքի դատավարությունն ապացուցեց, որ ցեղասպանության ժխտման քրեականացումը կարող է որևէ արդյունքի չհանգեցնել:

«Մեր նպատակը ոչ թե այս կամ այն երկրում օտրարերկրացու հայտարարությունն է, ցեղասպանություն եղե՞լ է, թե ոչ, օրենի ուժով նրան կդատե՞ն, թե ոչ, այլ մեր նպատակը հատուցման հասնելն է: Այս տեսանկյունից պետդումայի որոշումը կապված է միայն օդանավի պատմության հետ: Ցավոք սրտի, մեր բարեկամ ռուսները միայն այդ դեպքից հետո հիշեցին Հայոց Ցեղասպանության ժխտումը քրեականացնելու մասին: Դա իրենց գործն է, հոգու պարտք եթե ունեն տալու, կարող են ընդունել, բայց դրանով ոգևորվել պետք չէ, պետք չէ չափից շատ այն խրախուսել,  մանավանդ որ մենք դրա նախադեպն ունենք»,-ասաց Մելքոնյանը:

Ինստիտուտի ղեկավարի խոսքով, եթե նպատակն արդար է ու անկեղծ, ապա Ռուսաստանը կարող էր ավելի շուտ այդ քայլին գնալ, օրինակ Հայոց Ցեղասպանության 100-րդ տարելիցի նախօրյակին:

«Դա ինձ հիշեցնում է այն պատմությունը, որ առաջին աշխարհամարտի նախօրյակին ռուսները հիշեցին հայերի հետ իրենց հարյուրամյա զինակցությունը և ըստ այդմ էլ առաջնորդվեցին:

Հիշեցնենք,  որ Ռուսաստանում Հայոց ցեղասպանությունը ժխտելու համար կարող է սահմանվել մինչ երեքից հինգ տարվա ազատազրկում: Ռուս պատգամավորները առաջարկել են Հայոց ցեղասպանության ժխտման համար սահմանել մինչև 300 հազար ռուբլի տուգանք, կամ մինչև երեք տարի ազատազրկում: Իսկ բոլոր այն դեպքերում, երբ ժխտումը՝ այսինքն հանցագործությունը, տեղի է ունեցել ԶԼՄ-ների միջոցով, տուգանքը առաջարկվում է սահմանել 500 հազար ռուբլի կամ մինչև 5 տարի ազատազրկում:

«Արդար Ռուսաստան» խմբակցության ղեկավար Սերգեյ Միրոնովը նշել է,  որ Հայոց ցեղասպանության ճանաչումը կամ չճանաչումը պատմության հարց չէ, այլ բարոյականության և առաքինության: