Ձեր վստահելի աղբյուրը

Դեկտեմբերի 3-ին «Չեք անցկացնի» շարժումը, որին միացել են ՀԱԿ-ը և ՀԺԿ-ն, կուժեղացնի Ազատության հրապարակում սահմանադրական փոփոխությունների դեմ շուրջօրյա հավաքներ սկսած «Նոր Հայաստան» հանրային փրկության ճակատը: Ազատության հրապարակում «Նոր Հայաստանի» հանրահավաքի ժամանակ հայտարարեց ՀԱԿ ներկայացուցիչ Վլադիմիր Կարապետյանը:

«Իշխանությունները հենց սկզբից տարածում էին այն թեզը, որ «ոչ»ի շարժումը պառակտված է և միասնական չէ, նրանց ասածների մեջ կա միայն մեկ ճշմարտություն. «ոչ»-ի շարժումը դարձել է բազմազան, տարածվել, և հիմա ողջ հայ ժողովուրդն է «ոչ» ասում»,-ասաց ՀԱԿ անդամը:

«Նոր Հայաստան»-ի քաղխորհրդի անդամ Հմայակ Հովհաննիսյան էլ ասաց. «Մեր պայծառ երիտասարդությունը ամառը տասն օր շարունակ իր ընբոստությնուը արտահայտեց «Մենք ենք տերը մեր երկրի» կարգախոսով և ցույց տվեց, որ ինքը քաղաքական կեցվածք է որդեգրել: Այսօր էլ սահմանադրական փոփոխություններով փորձում են ժողովրդից վերցնել իր իշխանության և տեր լինելու իրավունքը»:

Նա հավելեց, որ ժողովրդի միակ փրկությունը  համախմբման մեջ է և այսուհետ, ժովովուրդը պետք է որոշի քաղաքական օրակարգը:

Քաղխորհրդի մեկ այլ անդամ Պետրոս Մակեյան էլ իր ելույթում անդրադարձավ օրեր առաջ ԱԱԾ կողմից վնասազերծված խմբին և նշեց. «Այն որ այդ խումբը կապում են սիրիահայության և ընդդիմության հետ՝ անբարոյականություն է և վտանգավոր»:

Նշենք, որ հանրահավաքից հետո նախատեսվում է երթ անցկացնել Երևանի կենտրոնական փողոցներով: