Ձեր վստահելի աղբյուրը

«Այն ամենը, ինչը կապված է արվեստի, մեր մեծերի հետ, ցավոք սրտի մեր երկրում ոչինչ չի արվում այդ ուղղությամբ»,- Panorama.am-ի հետ զրույցում ասաց բանաստեղծ Համո Սահյանի որդին՝ Նաիրի Սահյանը:

Նա տեղեկացրեց, որ ստիպված որոշել է վաճառքի հանել հոր անտիպ արխիվը, որպեսզի ստացված գումարով Երևանում բացվի Համո Սահյանի արձանը, իսկ Լոր գյուղում` նրա թանգարանը:

«2014 թվականին Համո Սահյանի 100-ամյակի առթիվ ստեղծվել էր հոբելյանական հանձնաժողով, մարդիկ ասում էին՝ սա է արվելու, այն է արվելու, գյուղում տուն-թանգարան է բացվելու, ոչինչ չի արվել մինչ օրս: Բարեգործական հիմնադրամ կար, թանգարանը կառուցել են, բայց աշխատանքները չեն ավարտել:
Երևանում պետք է տեղադրվի Համո Սահյանի հուշարձանը: Շախմատի տան հետևի մասում տեղ է հատկացված: Պայմանն այսպիսին է, որ հուշարձանը պետք է իմ ուժերով կառուցեմ և տեղադրեմ:

Երևանի Կասյան 3 շենքի պատին կա Համո Սահյանի հուշատախտակը: Քաղաքապետարանից եկել են շենքի պատերը մաքրել, վնասել են  հուշատախտակը: Նամակ գրեցի քաղաքապետին: Մարդ ուղարկեց, հանդիպեցինք հուշաքարի մոտ, հրաժարվեց, որ իրենք են արել, իսկ հարևաններն ասում են, որ հենց այդ ժամանակ է վնասվել:

Այս խնդիրները լուծելու համար գումար է պետք: Ինչ անեմ, ոչ ոք չի օգնում: Այդ հրաշալի մասունքները հանել եմ վաճառքի, որպեսզի այդ վերքերը փակեմ»,- ասաց Նաիրի Սահյանը:

Վարպետի որդու խոսքով, գրավոր դիմել է մեծահարուստներին, պատասխաններ չի ստացել, մշակույթի նախարարությունից էլ ասում են, որ գումար չունեն:

«Մեծ պոետ է չէ, ինչպես կարելի է այդպես վերաբերվել այդ մարդու հիշատակին»,- ասաց Ն.Սահյանը:

Արխիվում ընդգրկված են Գուրգեն Մահարու, Պարույր Սևակի, Գեղամ Սարյանի, Ստեփան Զորյանի, Վահագն Դավթյանի, Գևորգ Էմինի, Գարեգին Սևունցի, Անդրեյ Տարկովսկու` Համո Սահյանին ուղղված անտիպ նամակների բնօրինակներ, ինչպես նաև Սահյանի անտիպ գործեր, ձեռագրեր, հեռագրեր, թերթերում հոդվածներ և այլն:

Ն. Սահյանը նախապես ցանկացել է արխիվը հանձնել ԳԱԱ Գրականության ինստիտուտի թանգարանին. «Ինձ գումար պետք չէր, այդպես էի որոշել: Բայց հիմա ստիպված եմ գնալ այս քայլին: Դիմեցի Գրականության ինստիտուտին, որ գնեն, ասացին գումար չունեն, Ազգային արխիվից եկան, նայեցին, հիացան, հետո ասացին՝ գումար չունենք: Ուրիշ ինչ կարող էի անել: Ես  Համո Սահյանի վերջին ժառանգն եմ, պետք է այդ ամենն անեմ»: