Ձեր վստահելի աղբյուրը

Երևանի պետական բժշկական համալսարանում անցկացվել է  «Վիրաբույժների հայկական ասոցիացիա» հասարակական կազմակերպության հերթական նիստը, որին մասնակցել է  ՀՀ առողջապահության նախարար Արմեն Մուրադյանը: 

  ՀՀ ԱՆ գլխավոր վիրաբույժ, պրոֆեսոր Հովհաննես Սարուխանյանը նշել է, որ նիստը հրավիրված է  նոր նախագահություն ընտրելու  նպատակով: Միջոցառման սկզբին մեկ րոպե լռությամբ մասնակիցները հարգել են վերջին տարիներին կյանքից հեռացած  անվանի վիրավույժների հիշատակը:

Հովհաննես Սարուխանյանը ղեկավարել է այս մասնագիտական միավորումը 1987 թվականից սկսած: Նա համառոտ ներկայացրել է մեր երկրում վիրաբուժության  սկզբնավորման, կայացման և զարգացման ուղին: Պրոֆեսորը անդրադարձել է թե  հաջողություններին, թե  խնդիրներին:

Հովհաննես Սարուխանյանի առաջադրմամբ  և բաց քվեարկության արդյունքում Վիրաբույժների հայկական ասոցիացիայի նոր նախագահի պաշտոնում  միաձայն   ընտրվել է ԵՊԲՀ  Վիրաբուժության թիվ 4 ամբիոնի վարիչ, «Հերացի» թիվ 1 համալսարանական հիվանդանոցի վիրաբուժական կլինիկայի ղեկավար, պրոֆեսոր Մուշեղ Միրիջանյանը: Նա շնորհակալություն  է հայտնել ասոցիացիայի անդամներին վստահության համար:

«Այս կառույցի ղերակավարումը ոչ միայն պատվաբեր է, այլև պատասխանատու: Կատարված աշխատանքով կփորձենք արդարացնել սպասելիքները»,- ասել է Միրիջանյանը:

Ողջունելով ասոցիացիայի անդամներին ՀՀ առողջապահության նախարար Արմեն Մուրադյանը  ևս մեկ անգամ կարևորել է մասնագիտական միավորումների հետ արդյունավետ համագործակցությունը: Նախարարի գնահատմամբ`  ասոցիացիաները պետք է  մասնակից լինեն առողջապահության  համակարգում որակի ձևավորման,  էթիկական, ինչպես նաև բժիշկի գործունեությանը վերաբերող այլ մասնագիտական խնդիրների լուծման գործընթացին:

«Մասնագիտական միավորումների հետ համագործակցությունը մեր աշխատանքի կարևոր մասն է: Մենք սերտ աշխատում ենք  մասնագիտական միավորումների հետ` զարգացնելով տարբեր ուղղություններ»,- նշել է Արմեն Մուրադյանը:  Նա  մեծապես կարևորել է ավանի վիրաբույժ Հովհաննես Սարուխանյանի անգնահատելի ներդրումը Հայաստանում վիրաբուժության զարգացման և այս ասոցիացիայի ղեկավարման գործում:

Շնորհավորելով նորընտրի նախագահին` նա հույս է հայտնել, որ Վիրաբույժների հայկական ասոցիացիայի հետագա աշխատանքները կնպաստեն  ոլորտի զարգացմանը և առաջադեմ փորձի ներդրմանը:

Նիստի ընթացքում Հովհաննես Սարուխանյանը  ճանաչվել է ասոցիացիայի պատվավոր նախագահ: