Ձեր վստահելի աղբյուրը

«Եվրասիական տնտեսական միություն ստեղծելու գաղափարն առաջացել է հենց ԽՍՀՄ փլուզումից հետո: Այն ստեղծվեց, բայց սխալ են այն կարծիքները, պատկերացումները, որ փորձ է արվում վերստեղծել ԽՍՀՄ-ն, ծիծաղելի են նման խոսակցությունները»,-  Երևանում «Անդրկովկասի եվրասիական ճանապարհը. ինտեգրացիա հանուն զարգացման» թեմայով կլոր սեղանի ժամանակ ասաց ռուսաստանցի փորձագետ, Քաղաքական ինֆորմացիայի կենտրոնի գլխավոր տնօրեն Ալեքսեյ Մուխինը:

«Ամերիկացի գործընկերները կտրուկ արձագանքեցին միության ստեղծման գաղափարին՝ կասկածելով, թե Ռուսաստանը ստեղծում է նոր ռազմաքաղաքական միություն: Իրականում արևմտյան գործընկերներին անհանգստացնում էր այլ բան, որ հետխորհրդային տարածքում կարող է ստեղծվել ուժեղ, հզոր տնտեսական միություն»,- ասաց նա:

Փորձագետը նշեց, որ եվրասիական  ինտեգրացիոն նախագիծը, որը լավ իմաստով «հաշվարկով ամուսնություն» է համարում,  պետք է կայանա, քանի որ միության մեջ ընդգրկվող երկրները միասին հարյուրամյա զարգացման ուղի են անցել, ինչը նրանց միջև ամուր կապեր է ստեղծել:

«Մենք գործ ունենք ինտեգրացիայի սկզբունքային նոր ձևաչափի հետ: Մենք վերլուծել են Եվրոպական միության զարգացման ուղին,  առանձնացրել ենք այն թույլ տեղերը, սխալները, որոնցից պետք է խուսափել: Եվրոպական երկրների ինտեգրացիոն փորձը մեզ շատ օգնեց: Նրանց գործած սխալները թույլ չտալով՝ մենք ավելի մեծ արդյունքի կհասնենք: Այդ գործընթացն արագ չէ, դրա զարգացման վրա ազդում են արտաքին գործոններ, նաև սոցիալ-տնտեսական վիճակը:  Եվրասիական ինտեգրացիոն նախագիծն անընդհատ զարգանալու է, չգիտեմ վերջում ինչ կլինի: Կարծում եմ՝ կստեղծվի ինտեգրացիոն նոր ձևաչափ, որը մոդել դառնա այլ ինտեգրացիոն գործընթացների համար: Այդ ճանապարհը մենք անպայման պետք է անցնենք: Այն երկրները, որոնք ավելի վաղ են մտել միության մեջ, մեկ քայլ առաջ կլինեն այն երկրներից, որոնք ինչ-որ բանի են սպասում, զգուշանում են, հետևում են գործընթացներին: Նկատի ունեմ Վրաստանին, Ադրբեջանին, այլ երկրների, որոնց հետաքրքրում է այն, ինչ տեղի է ունենում, բայց նրանց էլիտան դեռևս պատրաստ չէ իրենց տեսնել  արդյունավետ ինտեգրացիոն նախագծում»,- ասաց ռուսաստանցի փորձագետը: