Ձեր վստահելի աղբյուրը

Երևանում՝ Վազգեն Սարգսյան 3 հասցեում այսօր կբացվի նորակառույց կառավարական վարչական համալիրը, որի շինարարության մեկնարկը տրվել է 2013 թվականի ապրիլին:

Նոր համալիրը կառուցվել է Արդարադատության նախարարության նախկին այրված շենքի և շուրջ 25 տարի չգործող, վերականգնման ոչ ենթակա կենտրոնական շրջանային կաթսայատան հողատարածքի վրա: Համալիրի կառուցապատված և բարեկարգված տարածքն ընդգրկում է նախկին Սևան հյուրանոցի սահմանագծից  մինչև  ՀՀ Գլխավոր դատախազության շենք և Վ. Սարգսյան փողոցից մինչև Զաքյան փողոցի հատվածը:

Գլխավոր մասնաշենքում կտեղակայվեն Արտաքին գործերի՝ այդ թվում դիվանագիտական ակադեմիայի, կրթության և գիտության, մշակույթի, սփյուռքի նախարարությունները: Առանձնացված մասնաշենքում, որը գտնվում է Զաքյան փողոց նայող հատվածում, կտեղափոխվի Արդարադատության նախարարությանը: Նշենք, որ վարչական երկու մասնաշենքերը միմյանց հետ կապված են ստորգետնյա մեկհարկանի ավտոկայանատեղիով:

Գլխավոր մասնաշենքի հորինվածքը հնարավորություն է ընձեռել տարբեր գերատեսչությունների համար ստեղծել առանձնացված մուտքերով, նախասրահներով, վերելակներով և աստիճանավանդակներով ապահովված գործունեության պայմաններ:

Ինչպես լրագրողների հետ զրույցում նշեց ճարտարապետ Նարեկ Սարգսյանը, շենքի ճարտարապետական լուծումները մշակվել են քաղաքաշինական և ազգային ճարտարապետական մոտեցումներին համահունչ, կառավարական վարչական համալիրին հաղորդելով մոնումենտալ կերպար:

«Անկախ Հայաստանի պատմության ընթացքում առաջին անգամն է կառուցվում կառավարական համալիր: Մեզ համար կարևոր էր, որ ճարտարապետությունը լինի շարունակությունը բոլոր այն շենքերի, որ մենք ունեցել ենք մինչև օրս»,- ասաց Նարեկ Սարգսյանը:

Նրա խոսքերով՝ ընդհանուր առմամբ, բարդ խնդիր էր տեղաբաշխել նախարարությունները. սկզբից նախատեսված էր այստեղ տեղափոխել չորս նախարարություն, հետագայում դարձավ հինգ նախարարություն:

«Տարածքը մոտ 5000 քմ է և այդ տարածքում կազմակերպել բոլորի առանձնացված մուտքերը և մոտեցումները՝ դյուրին խնդիր չէր, սակայն մեզ հաջողվեց այդ խնդրին լուծում տալ»,- ընդգծեց Նարեկ Սարգսյանը:

Ըստ ճարտարապետի՝  նախագծի մշակման ճարտարապետական հայեցակարգի համար հիմք է ծառայել նախկինում այս հատվածում գտնվող արդարադատության նախարարության շենքի ծավալատարածական հորինվածքը: Նոր նախագծում վերամշակված ձևով կրկնվել է ոչ միայն ճակատների կոր պլաստիկան և մի շարք այլ լուծումները, այլև վերաշարադրված է նախկինում գոյություն ունեցող աշտարակը, դարձնելով այն կոմպոզիցիոն առանցք Շահումյանի հրապարակի նկատմամբ:

Պահպանված է նաև նախկին շենքի պարագծային լուծումները և անմիջապես հարևանությամբ գտնվող շենքի մասշտաբային հարաբերությունները՝ ստանալով առաջին պլանում մինչև  24 մետր բարձրությամբ  6  հարկանի շինություն:

Նշվեց նաև, որ Վազգեն Սարգսյան փողոց կողմից կամարակապ շքամուտքն  ունի 12,5 մետր լայնություն և 16,5 մետր բարձրություն:

«Շինության կամարը վերածել ենք  հաղթակամարի, իսկ կամարի աջ և ձախ կողմերում կան զարդաքանդակներ, որոնք կառավարական շենքերի զարդաքանդակների կրկնությունն են»,-նշեց Նարեկ Սարգսյանը:

Նա նաև տեղեկացրեց, որ մինչև փետրվարի վերջ բոլոր հինգ նախարարությունները կտեղափոխվեն կառավարական վարչական համալիր. «Նախարարությունների բնականոն գործընթացը չպետք է խաթարվի և հատված առ հատված մինչև փետրվարի վերջ կտեղափոխվեն այստեղ»:

Նարեկ Սարգսյանը վստահ է, որ նախարարության աշխատակիցները գոհ կլինեն այս պայմաններից,  քանի որ դրանք շեշտակի բարելավվել են և այս նոր համալիրը համեմատելու չէ նախարարությունների շենքի հետ:

«Սա երկրի դիմագիծը ձևավորող կարևոր կառույցներից մեկն է»,-եզրափակեց Նարեկ Սարգսյանը: