Ձեր վստահելի աղբյուրը

«Քվեարկեցի հանուն այն Հայաստանի, որ վաղուց էինք երազում, հանուն անցյալում կատարված սխալներն ուղղելու և նրա համար, որ իշխող կուսակցությունը և պետությունը չնույնացվեն այլևս, վերանա իշխանություն և ժողովուրդ  օտարումը, և իսկապես սկսենք լուրջ խորքային բարեփոխումների մի ընթացք»,-Քանաքեռ-Զեյթունի թիվ 3/23 տեղամասում Սահմանադրական փոփոխությունների հանրաքվեի քվեարկությանը մասնակցելուց հետո լրագրողների հետ զրույցում նշեց Ազգային ժողովի ՀՅԴ խմբակցության ղեկավար Արմեն Ռուստամյանը:

Նա վստահություն հայտնեց, որ հանրաքվեի հաջողության դեպքում գործը նոր պետք է սկսվի:

Լրագրողների դիտարկմանը, թե ՀԱԿ և «Ժառանգություն» կուսակցությունը ահազանգում են համատարած ընտրախախտումների մասին, արդյոք Դաշնակցությունը կեղծիքների մասին ահազանգ ստացել է, Ա.Ռուստամյանն ասաց, որ աղաղակող ընտրախախտումներ իրենք չեն արձանագրել:

«Մենք այդպիսի ահազանգեր չունենք, եթե լինեն, ապա՝ կասենք:  Իհարկե, ընտրախախտումների մասին ամբողջական խոսելը դեռ վաղ է, ամփոփ կներկայացնենք, երբ քվեարկությունն ավարտվի»,-ասաց նա:

Անդրադառնալով լրացուցիչ ցուցակների հետ կապված խնդիրներին, որոնց մասին նույնպես ընդդիմադիրներ կուսակցությունները բարձրաձայնում են, Ա.Ռուստամյանն ասաց, որ ինքը նախ պետք է ամբողջ տեղեկատվությունը ստուգի և չի կարող մեկ կողմի հայտարարությունը հիմք ընդունի:

«Նույնականացման քարտերով քվերարկությունը նաև մեզ է անհանգստացրել: Կեղծիքներ կլինեն, քանի որ  իդեալական ընտրություններ երբեք չենք անցկացվել, այդ մշակույթը մենք դեռ չունենք: Իսկ եթե կեղծիքներ լինեն, ապա դրանց մասին ժամանակին կարձագանքենք»,- նշեց նա՝ հավելելով, որ բոլոր տեղամասերում ՀՅԴ-ն  ունի իր ներկայացուցիչները և հիմք են ընդունելու նրանց տրամադրած տեղեկատվությունը:

Հարցին, թե ինչպես է պատահում, որ ՀԱԿ-ը և «Ժառանգություն»-ը արձանագրում են խախտումներ, իսկ ՀՅԴ ներկայացուցիչները՝ ոչ,  Ա.Ռուստամյանն ասաց, որ նրանք արձանագրել են խախտումներ նաև մինչ հանրաքվեն և քաղաքական առումով, նրանց ձեռնտու չէ, որ Սահմանադրությունը փոխվի. «Վստահ եմ, որ ինչ էլ լինի, մեկ է՝ ասելու են, որ հանրաքվեն կեղծված է: Ոչ մի հանրաքվե հանրաքվեից հետո չի ընդունվել բոլորի կողմից: Մենք ասել ենք, որ մեզ համար կարևոր է այս քվեարկության լիգիտիմությունը և այս պահին, ընդհանուր առմամբ, ամեն ինչ նորմալ է, մարդիկ հանգիստ քվերակում են»:

Ա.Ռուստամյանը չցանկացած կանխատեսել, թե ինչպիսին կլինեն արդյունքները, սակայն նշեց, որ եթե «այո»-ն չանցնի՝ դարձյալ պայքարելու են նույն համակարգի փոփոխության համար: Նրա խոսքերով՝ մարդիկ պետք է հասկանան, որ 24 տարվա ընթացքում կուտակված դժգոհությունները եղել են նաև այս նույն համակարգի պատճառով:

«Եթե ուզում ենք մի բան փոխել, ապա «Այո»-ով կարող ենք փոխել, իսկ եթե ուզում ենք նույնը պահպանենք, ապա պետք է  «Ոչ» քվերակենք», - ընդգծեց Ա.Ռուստամյանը: