Նորաստեղծ «Հայաստան Արցախ հիմնադրամը» կշարունակի մարդասիրական օգնություն ուղարկել

Հասարակություն 08:54 06/12/2015 Աշխարհում

2015 թ. դեկտեմբերի 1-ին Գլենդելում հիմնադրվել է շահույթ չհետապնդող մի նոր կազմակերպություն՝ «Հայաստան Արցախ հիմնադրամը», որի նպատակն է լայնածավալ մարդասիրական աջակցություն ցուցաբերել Հայաստանի և Արցախի բնակչությանը:

«Նկատի ունենալով հայկական երկու հանրապետություններում տիրող համատարած աղքատությունը և գործազրկությունը, «Հայաստան Արցախ հիմնադրամի» առաքելությունն է՝ շարունակել մարդասիրական այն հսկայական աշխատանքը, որ Միացյալ հայկական հիմնադրամը իրականացրել է վերջին 26 տարիների ընթացքում՝ 720 մլն դոլար արժողությամբ մարդասիրական օգնություն տրամադրելով Հայրենիքին: «Հայաստան Արցախ հիմնադրամը» կղեկավարեն Հարութ Սասունյանը՝ որպես նախագահ, և Նուրիցա Աբուժամրան՝ որպես ծրագրի տնօրեն, որոնք նմանօրինակ պաշտոններ զբաղեցրել են Միացյալ հայկական հիմնադրամում՝ մինչև վերջինիս գործունեության դադարեցումը 2015 թ. նոյեմբերի 30-ին»,-ասված է «Հայաստան Արցախ հիմնադրամի» մամուլի ծառայության տարածած հաղորդագրության մեջ:

«Հայաստան Արցախ հիմնադրամի» հոգաբարձուների խորհրդի անդամներն են Վիտալի Գրիգորյանցը, Հարութ Սասունյանը, Ստեփան Մարտիրոսյանը, Արսեն Միքայելյանը և Նուրիցա Աբուժամրան:

Աղբյուրի համաձայն, հանրահայտ գործարար Վիտալի Գրիգորյանցը «Հայաստան Արցախ հիմնադրամի» հոգաբարձուների խորհրդի ատենապետն ու գլխավոր բարերարն է: Նա նյութական անհրաժեշտ միջոցներ կհատկացնի հիմնադրամին, որպեսզի հնարավոր լինի միլիոնավոր դոլար արժողությամբ մարդասիրական օժանդակություն տրամադել ամեն տարի Հայաստանի և Արցախի հիվանդանոցներին, պոլիկլինիկաներին, դպրոցներին, մանկատներին և տարբեր բարեգործական հաստատությունների՝ նրանց տրամադրելով կենսական անհրաժեշտության դեղորայք, պատվաստանյութեր, բժշկական սարքավորումներ, մանկական սնունդ, գյուղատնտեսական սարքավորումներ, համակարգիչներ, ձմեռային հագուստ, կոշիկներ, խաղալիքներ, գրքեր և բազմաթիվ այլ ապրանքներ:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: