Ձեր վստահելի աղբյուրը

«Հրաշալի աշխատեցին «Ոչ»-ի շտաբի ներկայացուցիչները, «Նոր Հայաստանի» պատվիրակները: ՀԺԿ-ն, ՀԱԿ-ը «Ժառանգությունը», շարքային քաղաքացիները մանր-մունր հարցերը մի կողմ թողեցին ու միասին աշխատեցին»,- «Ազատության» հրապարակում ընթացող  «Հայ ազգային կոնգրես» և «Հայաստանի ժողովրդական» կուսակցությունների «Ոչ»-ի միասնական շտաբի հանրահավքի ժամանակ ասաց «Ժառանգություն» կուսակցության նախագահ Րաֆֆի Հովհաննիսյանը:

Նա նշեց, որ բոլորը հասկացան, որ մարտ է՝ հնի և նորի, կեղծիքի և ճշմարտության, արտագաղթի և վերադարձի, ստրկամատության և արժանապատվության:

«Պետք է որոշենք՝ որ ճանապարհն է մեզ միացնելու՝ խոսքը՝ խոսք, աշխատանքը՝ աշխատանքը և այն նպատակը, որ մեր առջև է, պարտավոր ենք ի կատար ածել:  Մեծ հույս ունեմ, որ քաղաքական ուժերը, հոսանքները, շտաբները, այդքան հասունություն, քաղաքացիական գիտակցության կգտնեն, որ առաջիկա շարժը, պայքարը, նպատակասլաց ուղին, որ տանելու է հաղթանակի, լինի միասնական՝ միասնական հրապարակով, միասնական օրակարգով:  Առանձին վերցրած թույլ ենք: Հրաժարական տուր, պարոն Սարգսյան»,- իր ելույթում ասաց Րաֆֆի Հովհաննիսյանը: