Ձեր վստահելի աղբյուրը

Ազգային ժողովում քննարկվում է «Լիցենզավորման մասին» ՀՀ օրենքում լրացում կատարելու մասին օրենքի նախագիծն առաջին ընթերցմամբ ընդունելու մասին հարցը:

Ինչպես նշեց հիմնական զեկուցող, ՀՀ քաղաքաշինության նախարար Նարեկ Սարգսյանը, «Լիցենզավորման մասին» ՀՀ օրենքով առաջարկվում է առաջարկվում է լիցենզավորման ենթակա օբյեկտների ցանկից հանել մի շարք օբյեկտների շինարարությունն ու դրանց նկատմամբ տեխնիկական հսկողությունը՝ համարելով դրանք չլիցենզավորման գործունեություն:

«Օրինակ, դրանց թվում են գյուղական բնակավայրերում կառուցվող, 300 քմ մակերեսը չգերազանցող, մինչև 2 վերգետնյա և մեկ ստորգետնյա հարկ ունեցող բնակելի տները, 150 քմ-ն չգերազանցող օժանդակ շինությունները և 50 քմ ընդհանուր մակերեսը չգերազանցող ավտոտնակները, 1000 քմ-ն չգերազանցող ջերմոցները, 300 քմ չգերազանցող արտադրական նշանակության և հասարակական նշանակության ոչ հիմնական շինությունները»,- նշեց քաղաքաշինության նախարարը: 

Նրա խոսքերով՝ նախատեսվող փոփոխությունների համաձայն, այդ օբյեկտների շինարարական աշխատանքները պետք է կատարվեն տնտեսական եղանակներով՝ առանց լիցենզավորված կապալառուի և տեխնիկական հսկիչի ներգրավման:

«Այս եղանակով, ըստ մեր հաշվարկների, մոտ 35 տոկոս միջոցներ կխնայվեն»,- ասաց նա:  

Ն.Սարգսյանը հայտնեց, որ արդեն կիրառման մեջ է դրվել օրինակելի  41 բնակելի տների նախագծերին զուգահեռ նաև ՓՄՁ-ների օրինակելի կատալոգը, որի առկայության պարագայում ևս չի պահանջվի նախագծային  աշխատանք, նախագծերի պատվիրում:

ՀՀԿ պատգամավոր Սուքիաս Ավետիսյանն ասաց, որ սա կարևոր նախաձեռնություն է, սակայն արդյոք այդ արտոնությունը չե՞ն ուզում տալ նաև քաղաքային բնակավայրերին՝ միայն ավտոտնակների համար, որովհետև այդ խնդիրը կա նաև քաղաքային բնակավայրերում:

Նարեկ Սարգսյանը պատասխանեց, որ այդ հարցը շատ է քննարկվել և առաջարկը եղել է, սակայն որոշվել է այս պահին ձեռնպահ մնալ քաղաքային համայնքներից: «Եթե այս պրոցեսը նորմալ գնա, դա օրակարգում, անկեղծ ասած, պահել ենք: Պարզապես չենք ուզում ամբողջ փաթեթը միանգամից անել, քանի որ ռիսկեր կան, ուստի գտնում ենք, որ այս պահին պետք է ձեռնպահ մնանք»,- ասաց Ն.Սարգսյանը:

ՕԵԿ պատգամավոր Մհեր Շահգելդյանը նույնպես նշեց, որ նախաձեռնությունը շատ կարևոր է. «Կարծում եմ՝ այս նախաձեռնությունը կազատականացնի դաշտը: Ինչ վերաբերում է իմ հարցին, ապա այն  անվտանգության խնդիրների մասին է, քանի որ Հայաստանը գտնվում է սեյսմիկ գոտում: Ի՞նչ եք կարծում, լիցենզավորման պահանջը հանելով` այստեղ խնդիրներ չեն առաջացնի»:

Ն.Սարգսյանն ասաց, որ այդ խնդրի հետ կապված բոլոր հնարավոր քայլերն արդեն արվել են, կան մշակված կատալոգներ, բոլոր օբյեկտների աշխատանքային գծագրերը, որոնք ազատվելու են լիցենզավորումից, դրանք տրամադրվելու են մարդկանց, ովքեր քաղաքապետարանից շինթույլտվություն պետք է ստանան, իսկ հսկողությունը լինելու է ընդհանուր հսկողության դաշտում:

Պատգամավոր Գուրգեն Արսենյանն էլ ասաց, որ իսկապես գյուղական բնակավայրում շինարարությունը վերածվել է պատուհասի: «Դուք ասացիք, որ օրենսդրական փոփոխությունից հետո կէժանանա շինարարությունը, բայց խնդիրը միայն էժանանալը չէ, այլ մարդկանց հոգսերը՝ այդ թույլտվությունների պատճառով: Այն չափորոշիչները, որ դուք հնչեցրիք, դրանք  ո՞ր երկրի օրինակի հիման վրա է վերցրած»,- հարցրեց պատգամավորը:

Նարեկ Սարգսյանն ասաց, որ  միջազգային պրակտիկայում ուսումնասիրություններ են արել, Ֆրանսիայի պրակտիկայից են վերցրել, բացի այդ, մեր փորձառությունն են հաշվի առել՝ չափորոշիչները մշակելիս: Իսկ ճարտարապետական վերահսկողությունն իրականցվելու համար կիրառում են կատալոգները, որի դեպքում չի պահանջվում ոչ նախագծի համաձայնեցում և մշակում, ոչ էլ փորձաքննություն: «Ուղղակի եռօրյա ժամկետում գլխավոր հատակագծի վրա նշում է արվում և տրվում է շինարարության թույլտվություն: Մեր բոլոր կանխատեսումները բերում են նրան, որ այս փուլում էական ազդեցություն կթողնի, բայց մենք չենք բացառում, որ քաղաքային բնագավառներում  կկիրառվի նույն մոտեցումը»,-  ընդգծեց քաղաքաշինության նախարարը:

Գուրգեն Արսենյանն ասաց՝ հույս ունի, որ շատ արագ այս օրենսդրական նախաձեռնությունը կյանքի կկոչվի : Միաժամանակ նա նախարարին խորհուրդ  տվեց նախաձեռնության ընդունումից հետո իրականացնել մոնիթորինգ՝ պարզելու, թե որքանով էր արդյունավետ այս որոշումը: