«ՌեԱնիմանիա»-ի շրջանակներում ՀՀ-ից երկու երիտասարդ կմեկնի Ֆրանսիա՝ վերապատրաստվելու

Մշակույթ 14:15 10/12/2015 Հայաստան

«ՌեԱնիմանիա» անմիացիոն կինոփառատոնի և ՀՀ-ում Ֆրանսիայի դեսպանության միջև համագործակցությունն էլ ավելի է խորանում: Այսօր լրագրողների հետ հանդիպմանը նշեց Ֆրանսիայի դեսպանության մշակութային հարցերով կցորդ Նատալիա Ցագրիսը:

Նա բարձր գնահատեց համագործակցությունը. «Ֆրանսիան մեծ ուշադրություն է դարձնում կինեմատոգրաֆիային, հատկապես անիմացիոն ֆիլմերին, որոնք քանակական արժեքով համահավասար են Ֆրանսիայում արտադրված մյուս տեսակի ֆիլմերին: Մեր երկիրն ամեն ինչ անում է, որ Հայաստանում նույնպես զարգանա կինեմատոգրաֆիան և հատկապես անիմացիայի ճյուղը»:

Նատալիա Ցագրիսը տեղեկացրեց, որ իրենք համագործակցում են «Մոսկվա» կինոթատրոնի հետ, որտեղ ամեն հինգշաբթի ցուցադրվում է ֆրանսիական ժամանակակից մեկ նոր ֆիլմ:

«ՌեԱնիմանիա» փառատոնի հիմնադիր տնօրեն Վրեժ Քասունին էլ առանձնացրեց երկու գործընկերների կողմից նոր տեսակի համագործակցության ստանձնումը՝ վերապատրաստման և կրթության բնագավառում:

Նշենք, որ առաջին անգամ Ֆրանսիայի դեսպանությունը կրթաթոշակ է տրամադրել երկու հայազգի երիտասարդի վերապատրաստման համար, ովքեր 2016 թ կմեկնեն Անգուլեմի կինոյի դպրոց:

Կրթաթոշակի համար մրցույթը հայտարարվել էր դեռևս այս տարվա հոկտեմբերի 9-ին և ընտրությունը կատարել էր Անգուլեմի անիմացիոն կինոյի դպրոցը: Հայտ ներկայացրած երիտասարդ անիմատորներից կրթաթոշակը շնորհվել է Լևոն Բարսեղյանին և Շուշանիկ Եսայանին: Դասընթացի շրջանակներում երիտասարդներին կուսուցանվի անիմացիոն հմտություններ:

Հանդիպմանը ներկա երիտասարդները նշեցին, որ վերադառնալուց հետո, իրենց փորձով կկիսվեն նաև այստեղի երիտասարդ անիմատորների հետ:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: