Ձեր վստահելի աղբյուրը

Հայ մասնագետների ստեղծած Shadowmatic խաղը ճանաչվել է AppStore-ի 2015թ. լավագույն խաղ (App Store Best of 2015):

«Մենք չափազանց հպարտ ենք և պատիվ է, որ ճանաչվել ենք AppStore-ի 2015թ. լավագույն խաղը (Store Best of 2015)»,- Shadowmatic -ի ֆեյսբուքյան էջում գրել են խաղի ստեղծողները:

Հիշեցնենք, որ Shadowmatic խաղն այս տարվա հունիսի 8-ին արժանացել էր տեղեկատվական տեխնոլոգիաների առաջատարի Apple Design Award-ին: «Տրիադա Ստուդիո» (Triada Studio) ընկերության ստեղծած խաղը ամերիկյան հեղինակավոր Apple տեխնոլոգիական ընկերությունը գնահատել է յուրօրինակության, գրաֆիկական բարձր որակի և բացառիկ այլ հատկությունների համար:

Ավելի վաղ Panorama.am-ի հետ զրույցում «Տրիադա Ստուդիո»-ի ծրագրավորող Բագրատ Դաբաղյանն ասել էր. «Մենք այդ խաղը սարքելուց հասկանում էինք, որ այդքան էլ մեծ տարածում կարող է չստանալ: Ոչ բոլորը կուզեին խաղալ Shadowmatic, քանի որ այլ ոճի խաղ էր: Անհրաժեշտ է հանգիստ մոտեցում, տրամաբանություն, երևակայություն: Իրականում չէինք սպասում, որ այդքան շատ մարդկանց դուր կգա: Տարբեր տեսակի, տարբեր ազգի ու տարբեր ճաշակ ունեցող մարդիկ մեզ նամակներ են գրում, շնորհակալություն հայտնում նման խաղ ստեղծելու համար: Զարմանալի արձագանքներ ենք ստանում: Մեկ այլ ստուդիայի աշխատող մեզ ասաց, որ ինքը չի սիրում այս խաղը, բայց իր տնօրենը շատ է սիրում, հանգստանալու համար հենց Shadowmatic է խաղում: Բրազիլիայից մեկը գրել էր, որ հայրը հիշողության հետ կապված խնդիրներ ունի, այս խաղը խաղալով առողջական վիճակը լավանում է: Աուտիկ երեխաների վրա էլ դրական ազդեցություն է ունենում: Մենք չէինք սպասում նման արձագանքների: Մենք չէինք նախատեսել, պատահական է ստացվել»:

Shadowmatic-ը երևակայության վրա հիմնված գլուխկոտրուկ է, որտեղ խաղացողը պետք է պտտի, համադրի ազատ տարածության մեջ գտնվող աբստրակտ օբյեկտները և փորձի նրանց՝ պատին ընկած ստվերով ստանալ ճանաչելի պատկերների, առարկաների սիլուետներ։ Shadowmatic-ի մենյուում և ամբողջ խաղի ընթացքում օգտագործված է եռաչափ պառալաքս տեխնոլոգիան (3D parallax) զումի հնարավորությամբ։ Խաղն ընդհանուր առմամբ ունի 70 լեվել, որոնք բաժանված են 9 տարբեր միջավայրերով (սենյակներով): Նշենք, որ խաղը վաճառվում է Apple App Store-ում 2.99 դոլարով։