Ձեր վստահելի աղբյուրը

ՀՀ կառավարության այսօրվա նիստում վարչապետ Հովիկ Աբրահամյանի հանձնարարությամբ Տնտեսական մրցակցության պաշտպանության պետական հանձնաժողովի նախագահ Արտակ Շաբոյանը ներկայացրեց դեղերի շուկայում իրականացված մշտադիտարկման արդյունքները:

Նրա խոսքերով՝  ՏՄՊՊՀ-ն սեպտեմբեր-նոյեմբեր ամիսների ընթացքում ուսումնասիրություններ է իրականացրել «Նատալի ֆարմ», «Ալֆա ֆարմ», «Վագա ֆարմ», «Ամիկուս» և «Էսկուլապ» ընկերություններում:

«ՏՄՊՊՀ-ն ուսումնասիրություն է իրականացրել պարզելու՝ արդյոք կան չհիմնավորված գնային բարձրացումներ, թե՝ ոչ: Մեր ուսումնասիրությունների դաշտում են գտնվում խոշոր ընկերությունները, ուստի ուսումնասիրում կատարել ենք դեղ ներկրող առաջին հինգ խոշոր ընկերությունների շրջանում»,- ասաց նա:

Ա.Շաբոյանը նշեց, որ դեղերը շատ են, ուստի Հանձնաժողովը դիտարկումներ է իրականացրել կարևոր դեղերի գծով, այսինքն՝ այն դեղերի, որոնք ընդգրկված են Առողջապահության նախարարության հիմնական դեղերի ցանկում: Դրանք 483 անուն դեղ են:

Ուսումնասիրությունների արդյունքում պարզվել է, որ գնային էական բարձրացումներ են արձանագրվել «Նատալի ֆարմ» և  «Ալֆա ֆարմ» ընկերություններում՝ «Դիկլոֆենակ», Ֆոլաթթու ու ևս մի քանի դեղերի գծով:

«Գնային բարձրացումներ են եղել «Նատալի ֆարմ» և  «Ալֆա ֆարմ» ընկերությունների մոտ՝ վերը նշված դեղերի մասով, ինչը պայմանավորված է այդ դեղերի ձեռք բերման գների բարձրացմամբ»,- ասաց Ա.Շաբոյանը:

Ըստ նրա՝  մնացած դեղերի գծով էական փոփոխություններ տեղի չեն ունեցել:

«Ուսումնասիրությունները շարունակական բնույթ են կրելու և եթե պարզվի, որ գնային փոփոխությունները տեղի են ունենում տնտեսվարողների հակամրցակցային գործողությունների հետևանքով, ապա տվյալ ընկերությունները կենթարկվեն խիստ պատասխանատվության»,- ասաց Ա.Շաբոյանը:

Վարչապետ Հովիկ Աբրահամյանն իր հերթին հորդորեց Արտակ Շաբոյանին դեղերի  շուկայի նկատմամբ լինել հետևողական: