Ձեր վստահելի աղբյուրը

Հայաստանում ընտանեկան բռնության դեմ պայքարը օրենսդրական դաշտի կարգավորման խնդիր ունի: Հայաստանում ընտանեկան բռնության և երեխաների հանդեպ ոտնձգությունների վերաբերյալ աշխատաժողովի ժամանակ ասաց ամերիկացի փորձագետ լեյտենանտ Ջեյմի Պրոսերը: Ըստ նրա, Հայաստանում չկա հստակ օրենք,  որի հիման վրա ոստիկանները կարող են արձագանքել, քրեական հետապնդում  իրականացնել  հենց ընտանեկան բռնության համար, բացառությամբ մարմնական վնասվածք պատճառելու հոդվածով հետապնդում իրականացնելը:

«Կա նաև բավարար չափով հանցագործության մասին հաղորդում չներկայացնելու խնդիրը, բայց ավելի կարևոր խնդիր է օրենսդրության  պակասը»,- ընդգծեց ամերիկացի փորձագետը:

Մինչդեռ, ըստ նրա, ԱՄՆ-ում ընտանեկան բռնության դեմ պայքարի օրենքը շատ խիստ է:

«Նևադայի նահանգում ոստիկանն արձագանքում է ընտանեկան բռնության միջադեպին, քրեական հետապնդում է իրականացնում ոչ թե տուժողի մասնավոր մեղադրանքով, այլ Նևադայի նահանգի պետական ոչ հայեցողական մեղադրանքով: Բացի այս, օրենքն ընտանեկան բռնության դեպքում տուժողների աջակցության առումով շատ բան է նախատեսում»,- ասաց նա:

ՀՀ-ում ԱՄՆ փոխդեսպան Քլարկ Փրայսի խոսքով, այն երկրները, որտեղ կանայք ունեն լիարժեք ու հավասար իրավունքներ և հաջողության հասնելու հնարավորություններ, ավելի բարեկեցիկ են ու ավելի խաղաղ: Ըստ նրա, բռնությունը թույլ չի տալիս, որ քաղաքացիները լիարժեք մասնակցություն ու ներդրում ունենան իրենց ընտանիքի, համայնքի, երկրի ու պետության տնտեսական, քաղաքական և սոցիալական կյանքում:

Փոխդեսպանի խոսքով, ընտանեկան բռնության դեմ պայքարը կարևոր, առաջնահերթ ուղղություն է ԱՄՆ-ի կառավարության համար:

«Նախորդ տարի նախագահի հրապարակած ազգային անվտագության ռազմավարությամբ էլ է ընդգծվել այս ոլորտի կարևորությունը: Մենք կարծում ենք, որ ընտանեկան բռնության դեմ պայքարը նպաստում է ազգային անվտանգության մակարդակի բարձրացմանը թե ԱՄՆ-ում, թե Հայաստանում»,- ասաց Քլարկ Փրայսը:

Ըստ նրա, կարևոր է խնդրի դեմ միասնական պայքարը՝ քաղհասարակություն, ոստիկանություն, տուժողներ, իրավապաշտպաններ:

Նշենք, որ այսօր  հայ և ամերիկացի իրավապահները՝ այլ պետական պաշտոնյաների ու հասարակական կազմակերպությունների ներկայացուցիչների հետ անցկացրեցին մեկօրյա աշխատանքային քննարկում ընտանեկան բռնության դեմ պայքարի ուղիների վերաբերյալ, մի խնդիր, որ արդիական է բազմաթիվ ընտանիքների համար Հայաստանում:
ԵԱՀԿ-ի կողմից վերջերս անցկացված ուսումնասիրության տվյալներով, Հայաստանում հարցվածների 60 տոկոսը, հիմնականում՝ կանայք, նշել են, որ կյանքի ընթացքում իրենց նկատմամբ ընտանեկան բռնության առնվազն մեկ ձև կիրառվել է: Քննարկման մասնակիցները դիտարկեցին այն ուղիները, թե ինչպես հասարակության բոլոր օղակները կարող են աշխատել միասին, այդ թիվը կրճատելու նպատակով:

Հայ մասնակիցների հետ միասին միջոցառմանը մասնակցում են երկու ամերիկացի փորձագետներ՝ լեյտենանտ Քելլի ՄքՄահիլը և լեյտենանտ Ջեյմի Պրոսերը, ովքեր աշխատում են Նևադայի նահանգի Լաս Վեգասի ոստիկանությունում: Նրանք Հայաստանում են գտնվում արդեն մեկ շաբաթից ավել, հանդիպումներ են ունեցել տեղի գործընկերների հետ և այցելել են ընտանեկան բռնության զոհերին օգնություն ցուցաբերող կառույցներ:

Այս մեկօրյա աշխատաժողովը ընտանեկան բռնության դեմ պայքարում Հայաստանին օժանդակելու ԱՄՆ հերթական քայլն է: 2014թ. նոյեմբերին ՀՀ ոստիկանության ներկայացուցիչները ճանաչողական այցով եղել են Սիեթլում և հանդիպում են ունեցել տեղի գործընկերների հետ:

2015թ. ապրիլին ԱՄՆ դեսպանությունն անցկացրեց կարիքների գնահատում՝ընտանեկան բռնության տարրերով հանցանքների հետ կապված Հայաստանի իրավապահ կառույցների ընթացիկ կարողությունների վերաբերյալ: Գնահատումը ակնառու դարձրեց այս աշխատանքներում այլ պետական կառույցների ներգրավման կարևորությունը: Երկրորդ ճանաչողական այցը կազմակերպվեց 2015թ. օգոստոսին, որի շրջանակում Քննչական կոմիտեի ու Աշխատանքի և սոցիալական հարցերի նախարարության ներկայացուցիչները եղան Լաս Վեգասի ոստիկանությունում:

ԱՄՆ դեսպանությունը՝ իր գործընկերների և ամերիկյան փորձագետների հետ, առաջ շարժվելուն զուգընթաց ուշադրությունը կբևեռի երեք հարցերի. իրազեկման ապահովում և ուսուցումներ այն համայնքներում, որտեղ ձևավորվել են ճգնաժամային կենտրոններ. բազմապրոֆիլ աշխատանքային խմբի ձևավորում՝ ապահովելու միասնական ընթացակարգեր ուղղված ընտանեկան բռնության գործերի քննությամբ զբաղվող գերատեսչությունների հետևողական ու արդյունավետ աշխատանքին. և ուղղորդման մեխանիզմի/կարգի ձևավորում՝ բարելավելու աշխատանքների համակարգումը ընտանեկան բռնության դեմ պայքարում դերակատարում ունեցող կառույցների միջև: