Ձեր վստահելի աղբյուրը

«Այսօր տարածաշրջանը գտնվում է թոհուբոհի մեջ, հրդեհ է մեր շուրջ: Արդեն մեկ տարուց ավելի է, Ադրբեջանն օգտվելով այդ հանգամանքից, դիմել է մի մարտավարության, որի գլխավոր նպատակն է հյուծել, բարոյալքել, թուլացնել»,- Ազատության հրապարակում «Նոր Հայաստան» հանրային փրկության ճակատի հրավիրած ասուլիսում ասաց «Նոր Հայաստան»-ի քաղաքական խորհրդի անդամ Ժիրայր Սեֆիլյանը:

Ժ.Սեֆիլյանի խոսքով, պետք է ադրբեջանական բանակին ոչ թե համաչափ, այլ անհամաչափ պատասխան տրվի՝ արդյունքի հասնելու համար: 

Խոսելով իրենց ճակատի անելիքների մասին, ասաց, որ իրենք, ի տարբերութուն 20-ամյա ավանդական ընդդիմության, չեն եզրափակելու իրենց հանրահավաքները՝ հայտարարելով, թե ամեն ինչ արել են, ժողովուրդը չեկավ:

«Մենք այդպես չենք վարվելու, մեղքը մեր ժողովրդի վրա չենք գցելու: Եթե այսօր պետք եկած չափով չի հաջողվում մոբիլիզացիա իրականացնել, նշանակում է մեր մարտավարությունում սխալներ կան, ուղղումներ են պետք: Համոզված եմ՝  օր առաջ անելու ենք այդ ուղղումները, իսկ վերջում գտնելու ենք  մոբիլիզացիայի բանալին: Մենք երբեք չենք դադարեցնելու մեր պայքարը, հնարավոր է ընդմիջումներ լինեն»,- ասաց Ժ. Սեֆիլյանը:

Հիշեցնենք, որ «Նոր Հայաստան» փրկության ճակատը  դեկտեմբերի 12-ից սկսած ամեն օր հրապարակում անցկացնում է  ասուլիս, ճեպազրույց, քննարկում, իսկ դեկտեմբերի 16-ից սկսած այցելելու են տարբեր մարզեր: