Ձեր վստահելի աղբյուրը

ՀՀ Ազգային ժողովի արտահերթ նիստում այսօր քննարկման դրվեց «Ավելացված արժեքի մասին» ՀՀ օրենքում փոփոխություն կատարելու մասին օրենքի նախագիծը առաջին ընթերցմամբ ընդունելու հարցը:

Հիմնական զեկուցող, ՀՀ էկոնոմիկայի նախարարի առաջին տեղակալ Գարեգին Մելքոնյանը նշեց, որ նախագծով առաջարկվում է Հայաստանում անմաքս առևտրի գոտու ռեժիմից օգտվեն ոչ միայն օդանավակայանի տարածքում գործող  առևտրի կետերը, այլ նաև ցամաքային անցակետերում գործողները:

Մասնավորապես, ըստ նրա, օրենքի ընդունումից հետո Հայաստանի ցամաքային անցակետերում՝ Մեղրիում, Բավրայում և Բագրատաշենում, հնարավորություն է ընձեռնվելու, որ գործող անմաքս առևտրի կետերը ազատված լինեն ավելացված արժեքի հարկից:

«Նմանատիպ պահանջ ներկայացվել է մասնավոր հատվածից  և միջազգային փորձը ուսումնասիրելով կառավարությունը մշակել է այս նախաձեռնությունը, որով հնարավորություն կստեղծվի, որ այս ծառայությունն իրականացվի նաև ցամաքային անցակետերում»,- ընդգծեց Գ. Մելքոնյանը:

Փոխնախարարն ասաց նաև, որ այս պահին Հայաստանում կա ցամաքային անցակետ, որտեղ գործում է անմաքս առևտրի կետ, սակայն ի տարբերություն օդանավակայանների, այդ կետն ազատված չէ ավելացված արժեքի հարկից:

«Այս փոփոխությամբ մենք այդ հնարավորությունը տալիս ենք նաև ցամաքային անցակետերին: Այսինքն, բոլոր անցակետերը ազատվում են ավելացված արժեքի հարկից»,- նշեց Գ. Մելքոնյանը: