Պաշտոնյաներից տուժած քաղաքացիները կարող են մինչև 3 մլն դրամ բարոյական վնասի փոխհատուցում ստանալ
Կառավարությունը խորհրդարանին է ներկայացրել «Քաղաքացիական օրենսգրքում փոփոխություններ և լրացումներ կատարելու մասին» օրենքի նախագիծը, որը կարգավորում է բարոյական վնասի փոխհատուցման ոլորտը:
Այսօր ԱԺ արտահերթ նստաշրջանում նախագիծը խորհրդարանականներին ներկայացնելիս, արդարադատության նախարարի տեղակալ Արման Թաթոյանը նկատեց, որ ներկայումս բարոյական վնասի փոխհատուցման համակարգը թեպետ գործում է, բայց լիարժեք չէ, իսկ փոխհատուցման չափերը չեն համապատասխանում միջազգային չափորոշիչներին:
«Նախագծերի ընդունմամբ մեր քաղաքացիներին հնարավորություն կընձեռվի ստանալ ոչ նյութական վնասի հատուցում այն դեպքերում երբ նրանց իրավունքների ոտնահարում է տեղի ունեցել և դրա հետևանքով ոչ նյութական վնաս են կրել պետական մարմնի, պաշտոնատար անձի կամ Տեղական ինքնակառավարման մարմնի ու ՏԻՄ պաշտոնատար անձի գործողություններից կամ անգործությունից», -հայտարարեց Թաթոյանը:
Առաջարկվող փոփոխությամբ, բարոյական վնասի փոխհատուցում կարող է տրվել ոչ միայն դատական կարգով հաստատված խախտումներին, այլ նաև քրեական հետապնդման մարմնի կողմից խախտման հաստատման դեպքում, մինչև դատարան հասնելը:
Մինչ այժմ բարոյական վնասի փոխհատուցում հնարավոր էր տալ անձնական ազատության իրավունքի, խոշտանգման, կյանքի իրավունքի խախտման և ապօրինի դատապարտման դեպքերում: Ներկայացվող նախագծով, կառավարությունը ընդլայնել է իրավունքների շարքը և փոխհատուցում հնարավոր է տալ բնակարանի անձեռնմխելիության իրավունքի, անձնական և մասնավոր կյանքի իրավունքի, արդար դատաքննության իրավունքի, հավաքների ազատության իրավունքի խախտման դեպքերում:
«Շատ կարևոր է, որ մենք ընտրել ենք այս իրավունքների ցանկը, հիմք ընդունելով հայտնի չափանիշը, որ եվրոպական դատարանը կիրառում է և տալիս ինքնուրույն հատուցման հնարավորություն: Եթե դուք գտնեք իրավունք, որը ներառված չէ ցանկում, նշանակում է, որ այդ իրավունքով ինքնուրույն հատուցում չի տրվում», -ներկայացրեց նախարարի տեղակալը:
Անդրադառնալով փոխհատուցման չափերին, Թաթոյանն ասաց, որ դրանք զգալի մեծացրել են. գործող մինչև 1 մլն դրամից թիվն աճել է և կարող է փոխհատուցում տրվել մինչև 3 մլն դրամ:
«Այստեղ կա մի նրբություն, եթե դատարանը գտնում է, որ անձին պատճառվել է ծանր վնաս և կոնկրետ դեպքի առանձնահատկություններից ելնելով, դատարանը կարող է դուրս գալ այս չափերից: Այսինքն` դատարանը որևէ չափով սահմանափակված չէ», -հավելեց պաշտոնյան:
Մեկ այլ կարևոր փոփոխություն ևս արվել է. փոխվում է գործող կարգը, որը ենթադրում էր դատական քաշքշուկ. այսինքն` անձը դիմում էր դատարան, հաստատվում էր խախտումը և հետո նորից դիմում էր դատարան ու ստանում փոխհատուցում: Առաջարկվող նախագծով նույն դատարանը կարող է նույն դատական ակտով ճանաչելով խախտման փաստը ու միաժամանակ փոխհատուցում նշանակել:
Թաթոյանն ասաց նաև, որ եթե խախտում կատարողը ՏԻՄ ներկայացուցիչ է, ապա փոխհատուցումը տուժած քաղաքացուն արվում է համայնքային բյուջեից, իսկ եթե խախտում կատարողը պետական պաշտոնյա է, ապա այդ դեպքում փոխհատուցումը տրվում է պետական բյուջեից:
«Մեկ այլ փոփոխություն էլ վերաբերում է հետադարձ պահանջին. Մասնավորապես, եթե առկա է պաշտոնատար անձի մեղքը, ապա հնարավորություն կա պետության համար այդ պաշտոնատար անձից գանձելու քաղաքացուն վճարված գումարը: Այս կարգավորումը առկա է միջազգային ոլորտում», -հավելեց արդարադատության նախարարի տեղակալը:
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
