Րաֆֆի Հովհաննիսյան. Որքան էլ թակենք աշխարհի դուռը, մենք տեղ չենք հասնելու

Քաղաքական 17:48 15/12/2015 Հայաստան

Րաֆֆի Հովհաննիսյան. Որքան էլ թակենք աշխարհի դուռը, մենք տեղ չենք հասնելու

«Արտաքին և ներքին քաղաքականությունն իրար հետ կապված են: Ինչպիսին է երկիրը ներքուստ, այնպիսն կլինի մեր արտաքին քաղաքականությունը»,- Ազատության հրապարակում «Նոր Հայաստան» հանրային փրկության ճակատի հրավիրած ասուլիսում ասաց «Նոր Հայաստան» ճակատի քաղաքական խորհրդի անդամ, «Ժառանգություն» կուսակցության ղեկավար Րաֆֆի Հովհաննիսյանը:

Նա նշեց, որ եթե երկիրը ներսում արդար է, կունենա ուժեղ, արդար, ընկալելի արտաքին քաղաքականություն:

«Ստի, կեղծիքի, վախկոտության, անարդարության պատկեր է ներսում: Որքան էլ թակենք աշխարհի դուռը, մենք տեղ չենք հասնելու: Բնավ զարմանալի չէ, որ ԵԽԽՎ-ում այսօր կա հակահայ երկու բանաձև»,- ասաց Ր. Հովհաննիսյանը:

Նա նշեց, որ յուրաքանչյուր պետություն ունի իր շահը և նման պարագայում պետք է Հայաստանը ամուր լինի:

«Մենք տանելու ենք մեր պայքարը բոլոր ճակատներով՝ դիվանագիտական արտաքին, առօրյա՝ ներքին»,- ասաց Ր. Հովհաննիսյանը:

Ըստ նրա, իրենք չեն քայլում բռնութան ճանապարհով, այլ ապահովելու են իշխանության հրաժարականի խաղաղ ընթացք, ապա ժողովրդական վստահության կառավարությունը կկազմակերպի արտահերթ նախագահական և խորհրդարանական ընտրություններ:

«Մեր պայքարը ոչ միայն հաղթանակի, իշխանափոխության համար է, այլ ժողովրդին իր իշխանությունը, սահմանադրական իր իշխանությունը վերադարձնելու համար»,- նշեց Ր.Հովհաննիսյանը:

Հիշեցնենք, որ «Նոր Հայաստան» փրկության ճակատը դեկտեմբերի 12-ից սկսած ամեն օր հրապարակում անցկացնում է ասուլիս, ճեպազրույց, քննարկում, իսկ դեկտեմբերի 16-ից սկսած այցելելու են տարբեր մարզեր:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: