Ձեր վստահելի աղբյուրը

«Սեզոնային գրիպի դեմ պատվաստանյութի բաղադրության մեջ խոզի գրիպի շտամը ևս մտնում է: H1N1-ն առանձին բաղադրիչ է»,-Panorama.am-ին ասաց ՀՀ ԱՆ իմունականխարգելման ազգային ծրագրի ղեկավար Գայանե Սահակյանը՝ անդրադառնալով այն լուրերին, թե այս պահին քննարկվում է խոզի գրիպի դեմ զանգվածային պատվաստումների իրականացման հարցը:

Սահակյանն ասաց, որ նախարարությունում նման հարց չի քննարկվել, այս պահին էլ չի քննարկվում:

«Նման հարց երբևիցե չի քննարկվել: Արդեն երեք տարի Հայաստանում իրականացվում է սեզոնային գրիպի դեմ պատվաստում: H1N1-ը պատվաստանյութի բաղկացուցիչ շտամն է»,-ասաց նա:

Սահակյանը մանրամասնեց, որ գրիպի դեմ պատվաստումն իրականացվում է կամավոր հիմունքներով, արդեն երկրորդ ամիսն է՝ պոլիկլինիկաներում այդ պատվաստանյութը կա, բոլոր ռիսկի խմբերը առողջապահության նախարարի հրամանով  ներառվել են պատվաստվողների ցանկում. «Բայց դարձյալ կամավոր հիմունքներով, ոչ մի պարտադրողական բան չկա: Խոցելի առաջին խումբը համարվում են բուժաշխատողները, որովհետև համաճարակի յուրաքանչյուր խմբային հիվանդացության դեպքում առաջին մարդը, որ շփվում է հիվանդի հետ, առաջին օղակի բուժաշխատողն է»:

Նշենք,  այսօր թերթերից մեկը գրել էր, որ ընթացիկ տարվա հոկտեմբերից մինչև այժմ Հայաստանում արձանագրվել է «խոզի գրիպի» 3 դեպք՝ երկու երեխա և մեկ հղի կին: Առողջապահության նախարարությունից հայտնել են, որ նրանք առողջացել են:

Ավելի վաղ առողջապահության նախարարությունը հրապարակել էր, որ ԱՀԿ  պաշտոնական տվյալներով եվրոպական 40 երկրում, այդ թվում՝ Հայաստանի Հանրապետությունում, հիվանդացության ակտիվությունը նշված հիվանդություններով գտնվում է ցածր մակարդակի վրա՝ գրիպի վիրուսների եզակի արձանագրմամբ:

Գրիպի Ա տեսակի H1N1 պանդեմիկ ենթատեսակն (խոզի գրիպ) այսօր առավել քիչ է շրջանառում, քան 2014-2015 թվականների գրիպի սեզոնին: Առողջապահության համաշխարհային կազմակերպությունը պաշտոնապես հայտարարել է, որ գրիպի Ա տեսակի H1N1 պանդեմիկ ենթատեսակն այսօր չունի պանդեմիկ ներուժ և դեռևս 2010 թվականից այն դասվել է մարդուն բնորոշ սեզոնային գրիպի ենթատեսակների շարքին։ Հետևաբար սահմանափակող միջոցառումներ չեն պահանջվում:

Նախարարությունից վստահեցնում են, որ  հանրապետությունում առկա են գրիպի ցանկացած տեսակի և ենթատեսակի բուժման համար նախատեսված հակավիրուսային պատրաստուկներ: