Եվրամիությունը հաստատել է Հայաստանում բարեփոխումներին ուղղված 30 միլիոն եվրոյի աջակցության ծրագիրը
Եվրոպական հանձնաժողովը ընդունել է Հայաստանին աջակցության 30 միլիոն եվրոյի նոր ծրագիրը։ Աջակցության այս ծրագիրը պետք է օգնի Հայաստանին կատարել բարեփոխումներ, որոնք ուղղված են իր քաղաքացիներին առավել լավ աշխատանքային հնարավորությունների տրամադրմանը, երկրի ֆինանսական կառավարման ամրապնդմանը և ժողովրդավարական որոշումների կայացման գործընթացին Հայաստանի քաղաքացիական հասարակության մասնակցության բարելավմանը։
Ինչպես տեղեկանում ենք Եվրոպական հանձնաժողովի կայքից, հայտարարելով աջակցության այս փաթեթի մասին, Եվրոպական հարևանության քաղաքականության և ընդլայնման հարցերով հանձնակատար Յոհաննես Հանն ասել է․ «Այս նորացված աջակցությունը մեր արևելյան հարևանին թույլ կտա վճռորոշ բարեփոխումներ իրականացնել։ Սա լավ նորություն է Հայաստանի քաղաքացիների համար, քանի որ այս բարեփոխումները, լինի այն ավելի լավ հանրային ծառայությունների կամ աշխատանքի առավել մեծ հնարավորությունների առումով, ուղղակիորեն օգտակար է լինելու նրանց համար»։
«Ավելի լավ որակավորում՝ ավելի լավ աշխատանքի համար» գործողությունը, որին տրամադրվում է 15մլն եվրո, ձգտելու է բարելավել Հայաստանի աշխատաշուկայի և աշխատուժի արդյունավետությունը՝ հատուկ ուշադրություն դարձնելով գյուղատնտեսության ոլորտում զբաղվածությանը։
«Հանրային ֆինանսական քաղաքականության բարեփոխումների ծրագիրը», որին տրամադրվում է 10մլն եվրո, ուղղվելու է Հայաստանում հանրային ծախսերի հաշվետվողականության, թափանցիկության ու արդյունավետության բարձրացմանը՝ միջազգային չափորոշիչներին և պրակտիկային համահունչ։ Այս ծրագիրը պետք է նաև օգնի կանխել կոռուպցիան։
«Քաղաքացիական հասարակության հնարավորություններ» ծրագիրը, որին տրամադրվում է 5մլն եվրո, կամրապնդի քաղաքացիական հասարակության կազմակերպությունների կարողությանը՝ արդյունավետորեն մասնակցել ժողովրդավարական որոշումների ընդուման գործընթացին։ Ծրագիրը կբարելավի կազմակերպությունների կարողությունները՝ ներգրավվելու քաղաքականության մշակմանն ու մոնիտորինգին։
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
