Ձեր վստահելի աղբյուրը

Խորհրդարանում քննարկվում է  «2015թ. նոյեմբերի 4-ին Երևանում ստորագրված, Հայաստանի Հանրապետության և Եվրասիական զարգացման բանկի միջև Եվրասիական տնտեսական ընկերակցության հակաճգնաժամային հիմնադրամի միջոցներից ֆինանսական վարկի տրամադրման մասին համաձայնագիրը վավերացնելու մասին» հարցը:

Հիմնական զեկուցող ՀՀ ֆինանսների նախարարի տեղակալ, գլխավոր գանձապետ Ատոմ Ջանջուղազյանը նշեց, որ 2009 թվականին ՀՀ-ն անդամակցել է Եվրասիական տնտեսական ընկերակցության հակաճգնաժամային հիմնադրամին, որին նպատակն է անդամ երկրների բյուջետային կամ վճարային հաշվեկշռի նպատակով վարկերի տրամադրումը, ինչպես նաև անդամ երկրներում ներդրումային վարկերի տրամադրումը  ազգային կամ միջպետական խոշոր ծրագրերի ֆինանսավորման  համար:

«Այս համաձայնագիրը, որը ներկայացվում է ձեր ուշադրությանը, Հայաստանի Հանրապետությանը բյուջետային աջակցության վարկ տրամադրելուն  է ուղղված: Նախատեսվում է, որ համաձայնագրի ներպետական ընթացակարգն անցնելուց հետո Հայաստանի կառավարությունը հնարավորություն կունենա Եվրասիական տնտեսական ընկերակցության հակաճգնաժամային հիմնադրամի միջոցներից ստանալ 300 միլիոն ԱՄՆ դոլար, երեք տարվա ընթացքում հավասար մասնաբաժիններով՝ սկսած 2015թ.-ից մինչև 2017թ.»,- ընդգծեց Ատոմ Ջանջուղազյանը:

Վարկի տոկոսադրույքը  կազմում է 2.1 տոկոս, տրամադրվում է 20 տարի մարման ժամկետով, որից 10 տարին արտոնյալ ժամանակահատվածն է: «Այս համաձայնագրի ստորագրմամբ հիմնադրամը արտահայտել է իր պատրաստակամությունը և տվել է իր համաձայնությունը Հայաստանին  բյուջետային աջակցության վարկ տրամադրել, ինչը կձևակերպվի որպես պետական բյուջեի պակասուրդի ֆինանսավորման աղբյուր»,- ասաց Ա.Ջանջուղազյանը:

Նա նշեց, որ ինչպես բոլոր բյուջետային աջակցության վարկերը, այնպես էլ այս վարկը բացառություն չի և այն տրամադրվում է դոնորի և ստացողի միջև ձեռք բերված որոշակի ծրագրերի իրականացման արդյունքում: «Տվյալ դեպքում խոսքը վերաբերում է ՀՀ կառավարության և կենտրոնական  բանկի կողմից նախաձեռնած և օրակարգում գտնվող բարեփոխումների որոշակի ծրագրերի, որի շուրջ ձեռք է բերվել համաձայնություն հիմնադրամի հետ, և հիմնադրամը գնահատել է, որ այդ ծրագրերի իրականացումը իր մեջ կարող է ենթադրել որոշակի կարճաժամկետ և միջնաժամկետ ռիսկեր բյուջեի կատարման տեսանկյունից, ինչով պայմանավորված նպատակահարմար է գտել միջոցներ տրամադրել ՀՀ-ը»,- նշեց Ա. Ջանջուղազյանը:

ԲՀԿ խմբակցության պատգամավոր Միքայել Մելքումյանն ասաց, որ ինքը դեմ չէ վարկերի ներգրավմանը:  «Մեզ տարեկան պետք է մի քանի միլիարդ դոլարի ներարկում, որպեսզի Հայաստանը չփողազրկվի, բայց երբ այդ վարկերը բերում են և եկեք ճիշտն ասենք, որ դուք էլ չեք հավատում  այդ վարկերի արդյունավետ օգտագործմանը: Ցույց տվեք մեխանիզմ, որ այդ վարկերն արդյունավետ օգտագործելու են, կա՞ արդյոք նման մեխանիզմ»,- հետաքրքրվեց ԲՀԿ-ական պատգամավորը:

Ա.Ջանջուղազյանն ասաց, որ իր բնույթով սա բյուջետային աջակցության վարկ է, իսկ բյուջետային աջակցության վարկը որևէ ծրագրին չի ուղղվելու, եթե կասկածի տակ է դրվում վարկի ծախսելը, կասկածի տակ պետք է լինի նաև բյուջետային մյուս բոլոր ծախսերը:

ԲՀԿ խմբակցության ղեկավար Նաիրա Զոհրաբյանն էլ նշեց, որ ՀՀ քաղաքացին չի վստահում Կառավարությանը և չի վստահում շատ օբյեկտիվորեն: «Չի վստահում օբյեկտիվորեն, քանի որ վարկերը մսխվում են, մսխվում են խայտառակ կերպով, մսխվում են տարբեր դիսերտացիաներ և լոլոներ կարդալու, տարբեր խորհրդատվությունների համար, և կա տոտալ անվստահություն թե ժողովրդի, թե քաղաքական բոլոր կուսակցությունների կողմից: Որևէ վարկ հակապետական նպատակներով չի վերցվում՝ բոլորի վերնագրերն էլ շատ ազնիվ ու բարի են, պետականամետ են, ժողովրդի  ծահերը սպասարկող, բայց դրանց արդյունքում մենք տեսնում են այդպես էլ չավարտված Հյուսիս-հարավ ճանապարհ, որը քանի վարկ կուլ տվեց, ջրօգտագործման համար վերցված տասնյակ վարկեր, դրանց վերջը չի էլ երևում»,- ասաց նա:

Ն. Զոհրաբյանը միաժամանակ նշեց, որ ԲՀԿ-ն հանդես է գալու նախաձեռնությամբ՝ խորհրդարանում ստեղծել ժամանակավոր հանձնաժողով, որը կքննարկի նախորդ և ներկա Կառավարությունների վերցրած վարկերը:

Ա.Ջանջուղազյանի խոսքերով՝  վարկերի օգտագործման արդյուանվետությունը ճիշտ նույնն է, ինչ-որ բյուջեով նախատեսված մյուս ծրագրերի դեպքում: «Ինչ վերաբերում է ժամանակավոր հանձնաժողով ստեղծելուն, ապա դա միտք է, որ կարելի է քննարկել, բայց պետք է այս պահից սկսած տեղեկացնեմ Ձեզ, որ որևէ հանձնաժողով աշխարհում ինձ հայտնի չէ, որ կարողանա ուսումնասիրել բյուջետային վարկը, որն ուղղված է բյուջեի ծրագրերի կատարմանը, քանի որ այլ ի՞նչ կերպ են գնահատում վարկի արդյունավետությունը, եթե ոչ բյուջեի կատարմամբ»,- ասաց գլխավոր գանձապետը: