Ձեր վստահելի աղբյուրը

«Հաշվի առնելով տարիներ ի վեր Ադրբեջանի կառավարության համակարգային ջանքերը անկախ լրագրության, ընդդիմադիր գործիչների եւ քաղաքացիական հասարակության ձայնը լռեցնելու ուղղությամբ, ԱՄՆ Կոնգրեսի Հելսինկյան հանձնաժողովի նախագահ Քրիս Սմիթը Ներկայացուցիչների պալատին է ներկայացրել «Ադրբեջանի ժողովրդավարացման 2015թ ակտը» անունը կրող բանաձեւը, որը այլ սանկցիաների թվում ներառում է Ադրբեջանի կառավարության բարձրաստիճան պաշտոնյաներին զրկել ԱՄՆ մուտք գործելու իրավունքից», - ասվում է դեկտեմբերի 16-ին ԱՄՆ Հելսինկյան հանձնաժողովի կողմից հրապարակված հաղորդագրության մեջ:

«Որպես ԵԱՀԿ անդամ-երկիր, 1992-ից ի վեր Ադրբեջանում անցկացված որեւէ ընտրություն չի համապատասխանել ԵԱՀԿ նվազագույն չափանիշերին: Նախագահի եւ պառլամենտի ընտրությունները շարունակաբար արհամարհել են ժողովրդավարական ընտրությունների անցկացման պահանջները», - գրված է բանաձեւում:

Սոցիալական ցանցերում որոշ օգտատերեր առաջարկում են Ադրբեջանի ակտը անվանել «Խադիջայի ակտ»՝ Ադրբեջանում ապօրինի բանտարկված լրագրող Խադիջա Իսմայիլովայի պատվին:

All credit to @cjcmichel, let's call this the #KhadijaAct https://t.co/mio7xj1z57

— Nate Schenkkan (@nateschenkkan) December 16, 2015

Մուտքի արտոնագրերի տրամադրման արգելքի հետ մեկտեղ բանաձեւը առաջարկում է նաեւ Ադրբեջանի բարձրաստիճան պաշտոնյաների նկատմամբ կիրառել ֆինանսական ներգործության մեխանիզմներ:

«Պատժամիջոցները կհանվեն միայն այն ժամանակ, երբ Ադրբեջանի կառավարությունը ցուցադրի հիմնավոր առաջընթաց քաղբանտարկյալներին ազատելու, քաղհասարակության անդամների նկատմամբ բռնաճնշումներին վերջ դնելու եւ ազատ ու արդար ընտրություններ կազմակերպելու ուղղությամբ», - ասվում է հաղորդագրության մեջ:

Բանաձեւը առանձին հաղորդագրություններով արդեն ողջունել են Freedom House եւ Human Rights Watch ամերիկյան իրավապաշտպան կազմակերպությունները: