Ձեր վստահելի աղբյուրը

Այսօր Կոմիտասի անվան կամերային երաժշտության տանը կայանալու է Հայաստանի պետական կամերային նվագախմբի (գեղարվեստական ղեկավար և դիրիժոր`Վահան Մարտիրոսյան), Հայաստանի  պետական կամերային երգչախմբի (գեղարվեստական ղեկավար և դիրիժոր՝ Ռոբերտ Մլքեյան) և «Հովեր»  պետական կամերային երգչախմբի  (գեղարվեստական ղեկավար և դիրիժոր՝  Սոնա Հովհաննիսյան) համատեղ համերգը:  Այս համերգով կեզրափակվի 2015 թվականի Հայաստանի պետական կամերային երգչախմբի Հայոց ցեղասպանության 100-րդ տարելիցին նվիրված միջոցառումների շարքը: Համերգի ընթացքում հնչելու է՝ Տիգրան Մանսուրյան՝   «Requiem»-ը, Գրիգ, Սիբելիուս, Գերշվին: Մենակատարներ՝ Էռա Հովսեփյան (սոպրանո), Աշոտ Ղանթարջյան (բարիտոն): Համերգը ղեկավարելու է դիրիժոր Ռոբերտ Մլքեյանը:

Լրագրողների հետ հանդիպման ժամանակ Ռոբերտ Մլքեյանն ասաց, որ Հայաստանի պետական կամերային երգչախմբի՝ Հայոց ցեղասպանության 100-րդ տարելիցին նվիրված համերգը մեկնարկել են հենց ապրիլի 24-ից Բեռնում: Այնուհետև նվագախումբը հանդես է եկել տարբեր երկրներում՝ Գերմանիա, Շվեյցարիա, Լիբանան, Արգենտինա, Հունաստան:

Ռոբերտ Մլքեյանը մասնակցել է Մեխիկոյի միջազգային փառատոնին, որի ընթացքում մեքսիկացիներից կազմված նվագախմբի և երգչախմբի հետ միասին ներկայացրել են  Տիգրան Մանսուրյանi  «Requiem»-ը:

«Դրսի բոլոր համերգները կայացած եմ համարում, երաժշտասեր հանրությունը կարողացավ ծանոթանալ հայ արվեստի նմուշների հետ: Բոլոր տեղերում ներկայացրել ենք հայկական երաժշտություն»,- ասաց Ռ.Մլքեյանը: