ՀՅԴ-ն, ՕԵԿ-ը և ԲՀԿ-ն դեմ քվեարկեցին «Գյուղատնտեսական կոոպերատիվների մասին» օրենքի նախագծի հատուկ կարգի ռեժիմին

Հասարակություն 13:05 18/12/2015 Հայաստան

ՀՀ Ազգային ժողովում այսօր քվերակության դրվեց «Գյուղատնտեսական կոոպերատիվների մասին» ՀՀ օրենքի նախագծի քննարկման հատուկ կարգի մասին ԱԺ որոշման նախագիծն ընդունելու հարցը:

ՀՅԴ խմբակցության պատգամավոր Արծվիկ Մինասյանը նշեց, որ օրենքի հետ կապված ներկայացրել են առաջարկներ՝ երկրորդ ընթերցումը տեղափոխելու հաջորդ քառօրյա, որպեսզի այդ ընթացքում աշխատանքներ տարվեն:

«Սակայն Կառավարության կողմից բացատրություն չեղավ: Դուք ունե՞ք որևէ տեղեկատվություն, թե ինչո՞վ է պայմանավորված այս հրատապությունը և հնարավո՞ր է, որ հաջորդ տարեսկզբին կառավարությունն առաջարկ ներկայացնի»,- ասաց Ա.Մինասյանը:

ԲՀԿ խմբակցության ղեկավար Նաիրա Զոհրաբյանը մինչ քվեարկությունը հայտնեց, որ գաղափարը նախագծի լավն է, բայց փաստաթուղթը բավականին փնթի է կազմված:

«ԲՀԿ-ն նույնպես խնդրեց, որ նախագիծը հետ տանեն և լավ գաղափարը նման փնթի կերպով չներկայացնեն: Մենք դեմ ենք նման հրատապության կարգով երեք ընթերցում կազմակերպելուն: Բնականաբար, հատուկ կարգի ռեժիմին քվեարկում ենք դեմ»,- նշեց Ն.Զոհրաբյանը:

ՕԵԿ խմբակցության պատգամավոր Հովհաննես Մարգարյանն ասաց, որ ՕԵԿ-ը նույնպես առաջարկել է հետաձգել քվերակությունը:

«Մեր գործընկերների մտահոգությունը տեղին է, որ այս օրենքը պետք է լրջագույնս քննարկվի: Չկա նաև պատասխան այն կարևոր առաջարկությանը, թե ի վերջո գյուղատնտեսական տնտեսությունները գյուղմթերքներ արտադրելուց ազատվա՞ծ են բոլոր տեսակի հարկերից, թե ոչ»,- ասաց Հ.Մարգարյանը:

Այդուամենայնիվ, որոշումն ընդունվեց 58 կողմ, 24 դեմ, 1 ձեռնպահ ձայների հարաբերակցությամբ:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: