Ձեր վստահելի աղբյուրը

Ազգային ժողովում Վերահսկիչ պալատի 2014 թվականի տարեկան հաշվետվության քննարկման ժամանակ պատգամավոր Նիկոլ Փաշինյանն անդրադառնալով ՎՊ նախագահ Իշխան Զաքարյանի առանձնատան հարցին՝ նշեց, որ շուրջ 3 տարի ձգվող խորհրդարանական հրապարակային քննությունից հետո ի վերջո հաջողվեց Վերահսկիչ պալատի նախագահ Իշխան Զաքարյանի հետ կապված մի չնաշխարհիկ կոռուպցիոն մեխանիզմ բացահայտել:

«Այդ բացահայտումը  ուշանում էր, քանի որ վերջին մեկ տարվա ընթացքում հնարավոր չէր լինում ՎՊ նախագահին բերման ենթարկել Ազգային ժողով, բայց երեկ Իշխան Զաքարյանն այստեղ էր, մեր կողքին նստած, և մենք բոլորս շատ հպարտ էինք, որ Իշխան Զաքարյանն աստեղ էր, մեր կողքին նստած, չնայած նա այսօր այստեղ չէ՝ մեր կողքին նստած»,- ասաց Ն. Փաշինյանը:

Ինչ վերաբերում է բացահայտված կոռուպցիային, ապա պատգամավորն ասաց, խոսքը ՎՊ նախագահի դղյակի մասին է, որը կառուցվել է Պաշտպանության նախարարության հարևանությամբ:

«Երբ Իշխան Զաքարյանը կառուցում էր իր մի քանի միլիոն դոլարանոց դղյակը պաշտպանության նախարարության ներկայիս շենքի հարևանությամբ, չէր կարող չգիտակցել, որ հարց է հնչելու, թե որտեղի՞ց իրեն՝ ողջ կյանքում միայն պետական պաշտոններ զբաղեցրած մարդուն այդքան փող՝ նման դղյակ կառուցելու համար: Սրա համար Զաքարյանը մի այսպիսի մեխանիզմ էր մտածել՝ այդ տունը, այո, կառուցում է ինքը, բայց կառուցում է ոչ թե իր, այլ սփյուռքահայ գործարար Ալբերտ Բոյաջյանի համար և վերջինիս փողերով»,- ասաց նա:

Ն.Փաշինյանը հիշեցրեց, որ նախորդ տարի իր կողմից հնչեցրած հարցից հետո ՎՊ նախագահը հրապարակել էր փաստաթղթեր:

Փաշինյանի ելույթին միջամտեց ԱԺ նախագահ Գալուստ Սահակյանը՝ հորդորելով խոսել ՎՊ տարեկան հաշվետվությունից, ոչ թե՝ Իշխան Զաքարյանից: 

«Պարո՛ն Սահակյան, հիմա ի՞նչ, ուզո՞ւմ եք վերջին օրերի խորհրդարանի քննարկումների մակարդակին համապատասխան ելույթ ունենամ, արտասանե՞մ... Ասենք՝ նապաստակ, նապաստակ, ի՞նչ ես նստել ծառի տակ: Թողեք, ելույթ ունենամ»,- նշեց Ն.Փաշինյանը:

ՀՀԿ-ական պատգամավորներից մեկը դահլիճից ասաց, թե «Ծիտիկ-ծիտիկն» արտասանի, ինչին ի պատասխան Նիկոլ Փաշինյանը նշեց. «Հույս ունեմ՝ «Ծիտիկ-ծիտիկը» ձեր խմբակցության պատասխան ելույթում կհնչի»:

Ապա պատգամավորը շարունակեց իր ելույթը՝ նշելով, որ նախորդ տարի Իշխան Զաքարյանը փաստաթղթեր հրապարակեց, որ սփյուռքահայ գործարարն իրեն լիազորել է իր հայաստանյան բանկային հաշիվներից անարգել փող հանել և ոնց ուզում է, ծախսել:

«Թվում է՝ ամեն ինչ նորմալ էր, բայց խորհրդարանի հարցուպատասխանի և մամուլի հետաքննության արդյունքում  ի վերջո Իշխան Զաքարյանը ստիպված էր խոստովանել, որ տունը պատկանում է իր ընտանիքին: Բայց մենք փաստաթուղթ ունենք, որ տունը կառուցվել է Ալբերտ Բոյաջյանին պատկանող փողերով: Ստացվում է ի՞նչ՝ Բոյաջյանը մի քանի միլիոն դոլա՞ր է նվիրել Իշխան Զաքարյանին: Այո, հենց այդպես էլ ստացվում է, և Իշխան Զաքարյանն ամեն ինչ բացատրում է իր և Բոյաջյանի ընկերական, բարեկամական հարաբերություններով: Բայց սա ի՞նչ հանելուկ է: Լավ, ընկերական հարաբերություններով կարելի է 10 հազար, 5 հազար, լավ 30 հազար նվիրել, բայց 1 մլն, 2 մլն փողը ո՞նց են նվիրում: Սա ինչ-որ բան պետք է նշանակի: Եվ ահա, երեկ հարցուպատասխանի ժամանակ սառույցը շարժվեց, և Իշխան Զաքարյանը խոստովանեց, որ Ալբերտ Բոյաջյանը Հայաստանում  սպորտային ոլորտի խոշոր օբյեկտների սեփականատեր է: Իսկ Իշխան Զաքարյանը տարիներ շարունակ Հայաստանում եղել է սպորտի ոլորտի ղեկավարը»,- ընդգծեց Ն.Փաշինյանը:

Ըստ պատգամավորի՝ այս ողջ կոռուպցիոն մեխանիզմը բացահայտելուց հետո ամենակարևոր հարցը հետևյալն է՝ ի՞նչ էր նշանակում ՎՊ-ի 2012 թվականի տարեկան աղմկոտ հաշվետվությունը:

«Իշխան Զաքարյանը կաբելը, պլենդուզի կտորը, գաջի կտորները ձեռքին ապացուցում էր, որ Տիգրան Սարգսյանի կառավարությունը լափում է ՀՀ պետական բյուջեի 70 տոկոսը: Հարցն էն չի, թե իրականում լափում էին, թե ոչ: Հարցն այն է, որ երբ մի կոռումպացված մարմին դուրս է եկել մեկ ուրիշ կոռումպացված մարմնի դեմ, ուրեմն այստեղ ինչ-որ բան այն չէ, այստեղ ուրիշ ենթատեքստ կա»,- ասաց Փաշինյանը:

Փաշինյանի ելույթից հետո ԱԺ նախագահ Գալուստ Սահակյանը հայտարարեց՝ դատական նիստն ավարտվեց, գործն էլ կարճվեց: