Ձեր վստահելի աղբյուրը

Ազգային ժողովի արտահերթ նիստում «Դեղերի մասին» օրինագծի քննարկման ժամանակ ՀԱԿ խմբակցության պատգամավոր Նիկոլ Փաշինյանն ասաց, որ այդ նախագծի նպատակն է դեղերի մատչելիությունը, բայց քննարկվող նախագծով  մի կողմից հենակետային գին են սահմանում՝ հիմնական դեղերի համար, մյուս կողմից դեղերի վաճառքով զբաղվողներին օժտում են նոր ծախսերով, որը կարող է բերել դեղերի գնաճի:

«Այս պրոցեսում մտավախություն չունե՞ք, որ սրա արդյունքում կլինի մոնոպոլացում, քանի որ եթե դեղի վաճառքով զբաղվողի ծախսերը մեծանում են, եկամուտները` քչանում, նշանակում է, որ զարտուղի ճանապարհներ պետք է լինեն: Ես մտածում եմ, որ կարելի է այս անիմաստ ծախսերից զերծ պահել: Օրինակ, դուք դեղը գրանցում եք, անընդհատ այդ դեղը մշտադիտարկման մեջ է բոլոր փուլերում, բայց մարդուն ասում եք՝ 5 տարին մեկ դեղը բեր վերագրանցի: Ինչի՞ համար, եթե ամենօրյա ռեժիմով դեղը վերահսկողության տակ է, ցանկացած պահի կարող եք կասեցնել, իսկ գրանցումը թանկ է հայաստանյան պայմաններում»,- ասաց Նիկոլ Փաշինյանը:

ՀՀ առողջապահության փոխնախարար Սերգեյ Խաչատրյանն անդրադառնալով 5 տարին մեկ դեղերի վերագրանցմանն՝ ասաց, որ դրանք միջազգային կազմակերպությունների կողմից մշակված կանոնակարգեր են և շարժվում են այդ կանոնակարգերով. «Չեմ կարծում, որ այս օրենքը բերելու է մենաշնորհների: Բացարձակ ազատականացված է և դեղերի ոլորտում մենաշնորհ ասվածը դժվար է պատկերացնել: 1500 ակտիվ նյութ կա աշխարհում, և դեղ ներմուծողները նույն ակտիվ նյութով կարող են տասնյակ անունով դեղեր բերել»:

Նիկոլ Փաշինյանն անդրադարձավ նաև դեղերի ռուսերեն գրելու խնդրին` ասելով, թե բոլոր բժիշկները դեղատոմսերը բացատրական թերթիկում գրում են ռուսերեն, ինչը մատչելիության խնդիր է առաջացնում. «Այսօր ունե՞ք վիճակագրություն, թե հայաստանյան բժիշկների քանի՞ տոկոսն է ախտորոշումը գրում ռուսերեն: Հսկայական թիվ է: Ինչո՞ւ օրենք չեք գրում, որ բժիշկները, առողջապահության ոլորտի պաշտոնյաները իրենց բոլոր գրագրությունները պետք է անեն հայերեն և եթե չեն անում, օրինակ, 500 հազար դրամ պետք է տուգանվեն: Քաղաքացին սոնոգրաֆիա է անում, գրում են՝ кишечник, չգիտեմ ինչ, էս ի՞նչ ա»:

ՀՀ առողջապահության փոխնախարար Սերգեյ Խաչատրյանը համաձայնեց, որ շատ բժիշկներ իսկապես ռուսերեն են գրագրություն վարում, որն իրենց համար այնքան էլ ընդունելի չէ: Ըստ նրա՝ տարիներ շարունակ քայլեր են իրականացվում և  քիչ-քիչ տարածվում է հայերեն գրագրությունն այս ոլորտում: Նրա խոսքերով՝ բժիշկների մեծ մասը սկսել է հայերեն գրել:

Ըստ Նիկոլ Փաշինյանի՝  եթե դեղատուփի վրա պետք է պարտադիր հայերեն լինի, ապա  ՀՀ-ում աշխատող բժիշկը պետք է հարգի հայերեն լեզուն: Նա մեկ անգամ ևս նշեց, ռուսերեն գրագրություն վարող բժիշկներին պետք է տուգանել: