Ձեր վստահելի աղբյուրը

ԱԺ արտահերթ նիստում քննարկվում է «Բարձրագույն և հետբուհական մասնագիտական կրթության մասին և «Կրթության մասին» օրենքներում լրացումներ և փոփոխություններ կատարելու մասին նախագծերի փաթեթը, որի նպատակն է նպատակային ընդունելության համար ճիշտ մեխանիզմ ստեղծել:

Ինչպես նշեց հարցը զեկուցող, ՀՀ կրթության և գիտության նախարար Արմեն Աշոտյանը, այս փաթեթով առաջարկում է՝ պետության համար գերակա մասնագիտությունների գծով նպատակային ընդունելության համակարգով բուհ ընդունվածները, ովքեր սովորում են պետպատվերի շրջանակներում, օրենսդրական փոփոխությունների արդյունքում իրենց հետագա պարտավորությունները կատարելուց հրաժարվելու դեպքում պետք է վերադարձնեն իրենց ուսման համար վճարված վարձավճարի կրկնակին:

«Ներկայացված օրենսդրական փաթեթը երկու կարևոր առաջարկ է անում, առաջինը՝ հստակեցնում է, թե ինչ է նպատակային ուսուցումը, երկրորդը՝ սահմանում է հստակ պահանջ, որ երիտասարդ մասնագետը ավարտելուց հետո եթե հրաժարվում է գործուղվել կառավարության կողմից համապատասխան կարգով սահմանված այս կամ այն բնակավար աշխատանքի՝ առնվազն երեք տարի ժամկետով, ապա պարտավոր է վերադարձնել պետական բյուջեից իր վրա ծախսած գումարի կրկնապատիկը»,- այս մասին ասաց ՀՀ կրթության և գիտության նախարար Արմեն Աշոտյանը:

Նրա խոսքերով՝ վերադարձված գումարի 70 տոկոսը առաջարկվում է  ուղղել պետբյուջեին, 30 տոկոսը`բուհին, որը կորոշի, թե ինչպես տնօրինել այն:

ԲՀԿ խմբակցության պատգամավոր Վահե Հովհաննիսյանն իր ելույթում  մտահոգություն հայտնեց նորավարտ մասնագետներին գործուղելու կապակցությամբ:

«Ստացվում է, որ բուհն ավարտածն անընդհատ պարտք է տալիս՝ հայրենիքին, մարզին, գյուղին: Նպատակային ընդունելությամբ եկավ, ստացավ գիտելիքներ, ավարտեց, իսկ ի՞նչ ենք առաջարկում մենք բուհն ավարտած երիտասարդ մասնագետին: Սոցիալական պայմաններ պետք է առաջարկենք, աշխատավարձ պետք է առաջարկենք: Ուղարկում ենք հեռավոր գյուղ՝ ո՛չ տուն կա, ո՛չ տեղ կա, ո՛չ էլ ապրելու բան: Պետական աշխատավարձը ստանալու է՝ կոպեկներ, բնականաբար, ամեն հնարավոր բան գտնելու է, որ չգնա: Հետևաբար, բացի պատժից, որ կրկնապատիկ գումարը պետք է վերադարձնի, մենք պետք է նաև սոցիալական որոշակի երաշխքների ապահովման համակարգ ստեղծենք: Երիտասարդ է, պիտի ամուսնանա, երեխա ունենա, այդ գյուղում ի՞նչ ենք տալու նրան»,- ասաց Վ.Հովհաննիսյանը:

Պատգամավորի խոսքերով՝ միջպետական պայմանագրերով շատ ուսանողների ուղարկում են արտերկիր՝ սովորելու, մինչդեռ շատերը հետ չեն գալիս:  «Դա իհարկե շատ վատ է, այդ հարցը վաղուց պետք է լուծեինք: Նույն հարցը այստեղ է առաջանում: Գնաց արտասահմանյան առաջատար բուհում սովորեց, եկավ հայրենիք, փառք ու պատիվ, մենք ի՞նչ ենք առաջարկում: Կարծում եմ, որ շատերը կհամաձայնեն՝ առաջ գնալու մեխանիզմը Հայաստանում կատարյալ չէ, դա կատարյալ չէ և պետական, և մասնավոր հատվածում»,- ընդգծեց Վ.Հովհաննիսյանը:

Ըստ նրա՝ եթե պետությունը երիտասարդին ուղարկում է առաջատար բուհերում սովորելու, ապա պետք է հետագայում առաջարկներ անի, թե որ ոլորտում է տեսնում կրթված մասնագետի ապագան: «Բայց բոլորս գիտենք, որ Հայաստանում շատ հաճախ ոչ թե մարդու գիտելիքն է գնահատվում, այլ բազմաթիվ այլ կապերը»,- ասաց  Վ.Հովհաննիսյանը: