Ձեր վստահելի աղբյուրը

Հայաստանի ազգային վիճակագրական ծառայության հրապարակած 2015-ի հունվար-նոյեմբեր ամիսների սոցիալ-տնտեսական ցուցանիշների համաձայն, Հայաստանի տնտեսական ակտիվության ցուցանիշը (ՏԱՑ) հունվար-նոյեմբերին նախորդ տարվա նույն ժամանակահատվածի համեմատ աճել է 2,9 տոկոսով։ Ինչպես տեղեկանում ենք ՀՀ ազգային վիճակագրական ծառայությունից, այս տարվա միայն նոեյմբերին նախորդ տարվա` 2014-ի նոյեմբերի համեմատ ՏԱՑ-ը նվազել է 2,9 տոկոս, իսկ նախորդ ամսվա` հոկտեմբերի նկատմամբ՝ 17,3 տոկոսով:

Ըստ ԱՎԾ-ի՝ առավելագույն աճը նշված ժամանակահատվածում գրանցվել է գյուղատնտեսության ոլորտում: Մասնավորապես, գյուղատնտեսական համախառն արտադրանքի ծավալն այս տարվա հունվար-նոյեմբերին նախորդ տարվա նույն ժամանակահատվածի ավելացել է 11.3%-ով, հունվարի-նոյեմբերին՝ 11.6%-ով, մինչդեռ ամսական կտրվածքով՝ հոկտեմբերի համեմատ, արձանագրվել է 50.6%-ի նվազում:

Ինչ վերաբերում է արդյունաբերական արտադրանքի ծավալին, ապա այն հունվար-նոյեմբերին աճել է 4.4%-ով, նախորդ տարվա նոյեմբերի համեմատ՝ 4,2%-ով, իսկ հոկտեմբերի համեմատ արտադրության ծավալը նվազել է 1%-ով:

Նախորդ տարվա նոյեմբերի համեմատ էլեկտրաէներգիայի արտադրության ծավալները նվազել են 5,9%-ով: Մինչդեռ հունվար-նոյեմբերի համեմատ արձանագրվել է էլեկտրաէներգիայի արտադրության ծավալների 1.4%-ի աճ, իսկ հոկտեմբերի համեմատ աճը կազմել է 8.6%-ով:

Ինչ վերաբերում է շինարարության ոլորտին, ապա այս տարվա 10 ամիսներին ոլորտում գրանցվել 3.1%-ի անկում, նախորդ տարվա նոյեմբերի համեմատ՝  19.1%-ի անկում, իսկ ամսական կտրվածքով գրանցվել է 6.5%-ի աճ:

ԱՎԾ-ի հրապարակած տվյալների համաձայն՝ առևտրաշրջանառության ծավալները հունվար-նոյեմբերին նվազել են 7.1%-ով, նախորդ տարվա նոյեմբերի համեմատ՝ 14.2%-ով, իսկ ամսական կտրվածքով անկումը կազմել է 4.9%-ով:

Այս տարվա հունվար-նոյեմբերին 3%-ի աճ է գրանցվել ծառայությունների ոլորտում, իսկ հոկտեմբերի համեմատ նվազել է 8.8%-ով:

Ինչ վերաբերում է սպառողական գներին, ապա, ըստ ԱՎԾ-ի` հունվար-նոյեմբերին գներն աճել են 4.1%-ով, մեկ տարում՝ 1.2 %-ով, իսկ հոկտեմբերի համեմատ՝ 0.6%-ով:

Ըստ ԱՎԾ-ի` արտաքին առևտրաշրջանառությունը այս տարվա հունվար-նոյեմբերին նախորդ տարվա նույն ժամանակահատվածի համեմատ նվազել է 20.6%-ով, նախորդ տարվա նոյեմբերի համեմատ՝ 22.9%, իսկ հոկտեմբերի համեմատ՝ 6.9%-ով: Այս տարվա 10 ամիսներին արտահանումը աճել է 4.7%-ով, իսկ ներմուծումը՝ 26.2%-ով:

Հունվար-նոյեմբերին հանրապետական միջին ամսական անվանական աշխատավարձը աճել է 8.5 %-ով, իսկ տարեկան կտրվածքով` 3.8%: Պետական համակարգում միջին աշխատավարձը աճել է 9.7%` կազմելով է 161 հազ. 515 դրամ: Ինչ վերաբերում է մասնավոր հատվածին, ապա այստեղ աճը կազմել է 7.1%՝ հասնելով 209 հազար դրամի: